Հոկտեմբերի 25-ին պատգամավորի մանդատ ստացավ Դավիթ Առուշանյանը: Վերջինս «Քաղաքացիական պայմանագիր» կուսակցության կողմից է առաջադրվել:

Դավիթ Առուշանյանը հոկտեմբերի 10-ին ազատման դիմում էր ներկայացրել Գյումրու համայնքի ղեկավարի տեղակալի պաշտոնից: Այս պաշտոնը ստանձնել էր 2021 թվականի նոյեմբերի 19-ին: Այժմ գործունեությունը շարունակում է Ազգային ժողովում:

MediaHub-ը ներկայացնում է պաշտոնատար անձի գույքի և եկամուտների մասին տեղեկատվությունը:

Cpcarmenia.am կայքից տեղեկանում ենք, 2021 թվականի՝ վերջին հայտարարագրում Դավիթ Առուշանյանը հայտարարագրել է երկու բնակարան, որոնք գնել է 2014 թվականին Երևանի Կենտրոն և Դավիթաշեն վարչական շրջաններում: Նույն թվականին պատգամավորը ձեռք է բերել նաև ավտոկայանատեղի Երևանի Կենտրոն վարչական շրջանում:

Գյումրու բնակարանի սեփականատերը Անի Առուշանյանն է՝ Դավիթ Առուշանյանի կինը: Դավիթ Առուշանյանը հայտարարագրել է նաև երկու տրանսպորտային միջոց՝ RANGE ROVER, որը գնել է 2016 թվականին և NISSAN՝ 2018 թվականին: Պատգամավորը չորս միլիոն դրամից կամ դրան համարժեք արտարժույթից ավելի արժեք ունեցող գույք չի հայտարարագրել: 2021 թվականի տարվա սկզբում Դավիթ Առուշանյանի բանկային հաշիվներում ներկայացված են եղել 1 միլիոն 100 հազար դրամ, որը տարվա վերջում դարձել է 1 միլիոն 180 հազար դրամ: Որպես կանխիկ դրամական միջոց պադգամավորը հայտարարագրել է 12 մլն դրամ, 16 հազար եվրո և 37,000 ԱՄՆ դոլար:

Ստացված փոխառությունների և վարկերի մայր գումարի մնացորդը 2021 թվականի դեկտեմբերի 31-ի դրությամբ կազմել է 75 հազար ԱՄՆ դոլար՝ նպատակային նշանակությունը հիփոթեքային վարկ:

Ըստ ՔՊ-ական նոր պատգամավորի՝ այս պահի դրությամբ առաջնային անելիքների շարքում է ՏԻՄ-երի խնդիրները, իսկ արդյունավետ կառավարման մեթոդը համարում է կառավարման համակարգերի ստեղծումը: Լրագրողների հետ ճեպազրույցի ժամանակ նա նշել էր, որ առաջիկայում քաղաքական հարցերի չի պատասխանի, առաջնային է համարում Գյումրու զարգացման ծրագրերը շարունակելը:

Շուշանիկ Միսկարյան