Հունգարիայի վարչապետ Վիկտոր Օրբանը շնորհավորել է Վրաստանի վարչապետ Իրակլի Կոբախիձեին ազատ ընտրություններում իշխող «Վրացական երազանք» կուսակցության հաղթանակի և այն բանի համար, որ վրացական իշխանությունները թույլ չեն տվել իրենց երկիրը վերածել «երկրորդ Ուկրաինայի»։
Իր վրացի գործընկերոջ հետ ճեպազրույցում Օրբանը շնորհավորել է նրան խորհրդարանական ընտրություններում իշխող կուսակցության հաղթանակի կապակցությամբ՝ դրանք անվանելով ազատ և ժողովրդավարական՝ չնայած ԵՄ-ում դա կասկածի տակ դնելու փորձերին։
Հունգարիայի վարչապետը վրացի գործընկերոջ հրավերով հոկտեմբերի 28-29-ը Վրաստանում է։ Ավելի վաղ Օրբանը, դեռևս Վրաստանում խորհրդարանական ընտրությունների առաջին արդյունքների հրապարակումից առաջ, շնորհավորել էր իշխող «Վրացական երազանք» կուսակցությանը «ապշեցուցիչ» հաղթանակի կապակցությամբ, ինչը քննադատությունների տեղիք էր տվել ԵՄ-ում։