Շվեդիայի իշխանությունները որոշում են ընդունել՝ առաջին անգամ Թուրքիայի քաղաքացուն արտահանձնել այն բանից հետո, երբ Անկարան պահանջել է Ստոկհոլմից մի շարք մարդկանց հանձնել ՆԱՏՕ-ին՝ Շվեդիայի անդամակցությանը հավանություն տալու դիմաց, հայտնել Է Reuters գործակալությունը:
ՆԱՏՕ-ին անդամակցող Թուրքիան ավելի վաղ հանել էր իր վետոն Շվեդիայի և Ֆինլանդիայի՝ Հյուսիսատլանտյան դաշինքին անդամակցելու համար։ Դա տեղի է ունեցել բանակցություններից հետո, որի ընթացքում Անկարան երկու սկանդինավյան երկրներին մեղադրել է Թուրքիայում արգելված Քրդստանի աշխատավորական կուսակցության (ՔԱԿ) անդամներին իբր թաքցնելու մեջ: Ինչպես ընդգծում Է գործակալությունը, կողմերի միջեւ ձեռք բերված համաձայնության շրջանակներում Թուրքիան ներկայացրել է այն մարդկանց ցուցակը, որոնց արտահանձնմանը ձգտում է հասնել:
Նշվում է, որ շվեդական իշխանությունները որոշել են արտահանձնել տղամարդուն, որը, շվեդական SVT հեռուստաընկերության հաղորդմամբ, Թուրքիայում դատապարտվել է 14 տարվա ազատազրկման՝ բանկային քարտերի հետ կապված խարդախության մեղադրանքով: «Դա սովորական գործ է։ Խոսքը 2013 եւ 2016 թվականներին Թուրքիայում խարդախության համար դատապարտված թուրք քաղաքացու մասին է», - գործակալությանը հայտնել է Շվեդիայի արդարադատության նախարար Մորգան Յոհանսոնը։
Շվեդիայում անցյալ տարի ձերբակալված տղամարդն ինքը հայտարարել է, որ Թուրքիայում իրեն անարդարացիորեն դատապարտել են այն բանի համար, որ նա ընդունել է քրիստոնեությունը, հրաժարվել է զինվորական ծառայությունից եւ ունի քրդական արմատներ, նշվում է ԶԼՄ-ներում: Շվեդիայի արդարադատության նախարարությունում չեն հստակեցրել, թե արդյոք այդ մարդը եղել է այն անձանց ցուցակում, որոնց արտահանձնումը պահանջել Է Թուրքիան: