ԱԳՆ-ից տեղեկանում ենք, որ դեկտեմբերի 23-ին Հայաստանի ԱԳ նախարար Արարատ Միրզոյանը ընդունել է Արցախի պատվիրակությանը՝ ԱԳ նախարարի պաշտոնակատար Դավիթ Բաբայանի գլխավորությամբ:

Նշվում է, որ հանդիպման ընթացքում զրուցակիցները քննարկել են Ադրբեջանի կողմից Լաչինի միջանցքի արգելափակման հետևանքները, Լեռնային Ղարաբաղում ստեղծված հումանիտար իրավիճակի մանրամասները:

Հիշեցնենք, որ Դավիթ Բաբայանը, Արցախի պետնախարարի խորհրդական Արտակ Բեգլարյանը, Արցախի ՄԻՊ Գեղամ Ստեփանյանը Լաչինի միջանցքի փակման “զոհերից են”՝ նրանք ժամանել էին Երևան մասնակցելու ցեղասպանության թեմայով համաժողովին, ապա չէին կարողացել իրենց բազմահազար քաղաքացիների պես վերադառնալ Արցախ: Բեգլարյանը նստացույց էր անում ՄԱԿ-ի գրասենյակի մոտ, Բաբայանը տարբեր հանդիպումներ ունենում ՀՀ իշխանությունների և ընդդիմության ներկայացուցիչների հետ:   

Սա առաջին հանդիպումը չէ, վստահ կարող ենք ենթադրել, որ նույն արդյունավետությունը կունենա, այսինքն՝ ոչինչ չի փոխվի: Այդ թվում նաև այն պատճառով, որ իրավիճակի պատասխանատվությունը ՀՀ իշխանությունները բարդում են ռուս խաղաղապահների վրա: Դեկտեմբերի 14-ին էլ ՀՀ ԱԳ նախարարի պարտականությունները կատարող Մնացական Սաֆարյանն ու ԱԳ նախարարի տեղակալ Վահե Գևորգյանն էին ընդունել Արցախի պատվիրակությանը՝ Դավիթ Բաբայանի գլխավորությամբ: Անցած տաս օրվա ընթացքում որևէ էական փոփոխություն, ինչպես գիտենք, չի եղել, իսկ Արցախի պետնախարար Ռուբեն Վարդանյանն էլ, որքան հասկացանք իր երեկվա հնչեցրած հայտարարություններից, մեծ հույսեր  չունի, որ Լաչինի միջանցքը այսօր-վաղը կբացվի.

«Պետք է պատրաստ լինել նրան, որ այս իրավիճակը կարող է նաև երկարաժամկետ լինել»,- ասել էր Վարդանյանն այն ծնողներին, որոնց երեխաները շրջափակման հետևանքով մնացել են Հայաստանում:

Սա, ի դեպ, ևս մեկ հարց է, ոչ պակաս կարևոր՝ ինչո՞ւ ՀՀ իշխանությունները չեն դիմում Կարմիր խաչին, որպեսզի վերջինս հումանիտար միջանցք բացի գոնե երեխաներին հայրենիք, ծնողների մոտ վերադարձնելու համար: Խոսքը, հիշեցնենք, 270 անչափահասի մասին է, որ մնացել են Հայաստանում ու արդեն 12 օր է կտրված են ծնողներից: 

Այն, որ ՀՀ իշխանությունները թքած ունեն այս հարցի վրա, պարզեցինք երեկ, երբ MediaHub-ի հետ զրույցում Կարմիր խաչի միջազգային կոմիտեի հայաստանյան գրասենյակի հաղորդակցման և կանխարգելման ծրագրերի ղեկավար Զառա Ամատունին հիշեցրեց, որ  նախաձեռնողական որևէ գործողություն Կարմիր Խաչը չի իրականացնում, այսինքն՝ իրենց պետք է դիմեն, որ իրենք էլ կարողանան որևէ քայլ անել.

«Այս դեպքում իշխանությունները պետք է մեզ դիմեն, մենք պատրաստակամ ենք աջակցություն ցուցաբերել, սակայն դեռ որևէ դիմում չենք ստացել այդ երեխաների համար պատասխանատու կառույցներից»,- ասել էր նա:

Մինչդեռ, ինչպես ցույց տվեցին վերջին օրերի զարգացումը, եթե հարցը բարձրաձայնվի, ապա չի բացառվում, որ դրական արդյունք լինի. ի վերջո, Ստեփանակերտի ԲԿ-ից հնարավոր եղավ Երևան տեղափոխել սրտի բաց վիրահատության կարիք ունեցող քաղաքացու: Դա հաջողվեց անել բանակցությունների արդյունքում: Իսկ երեխաներին տուն վերադարձնելու հարցի շուրջ, փաստացի, բանակցություններ չեն տարվում:

Անվերջ հանդիպումներ, 0 արդյունավետություն, շրջափակված Արցախ...