Հռոմի պապ Ֆրանցիսկոսը շաբաթ օրը պաշտոնանկ է արել Մալթայի միաբանության ղեկավարությանը եւ ստեղծել է ժամանակավոր կառավարություն՝ մինչեւ նոր Մեծ մագիստրոսի ընտրությունը, հայտնում է Reuters-ը։

Փոփոխությունները, որոնց պատճառով պոնտիֆիկը հրապարակել է հրամանագիրը, տեղի են ունեցել միաբանության ներսում նոր կանոնադրության շուրջ հին գվարդիայի եւ Վատիկանի որոշ անդամների միջեւ հինգ տարվա թեժ բանավեճերից հետո, որոնք, ինչպես ոմանք մտավախություն ունեին, կթուլացնի միաբանության ինքնիշխանությունը:

Մալթայի միաբանությունը, որի պաշտոնական անվանումն է Սուրբ Հովհաննես Երուսաղեմցու, Հռոդոսացու եւ Մալթացու հոսպիտալավորների ինքնավար ռազմական միաբանություն, հիմնվել է մոտ 1000 տարի առաջ՝ Սուրբ Երկրում ուխտավորներին բժշկական օգնություն ցուցաբերելու համար:

Այսօր նրա բազմամիլիոնանոց բյուջեն, 13 500 անդամները, 95 000 կամավորները եւ 52 000 բուժաշխատողները ղեկավարում են փախստականների ճամբարները, նարկոլոգիական կենտրոնները, աղետներից տուժածների օգնության ծրագրերը եւ կլինիկաները ամբողջ աշխարհում:

Նա չունի իրական տարածք, բացի պալատից եւ Հռոմում գրասենյակներից եւ Մալթայում ամրոցից, բայց ճանաչված է որպես ինքնիշխան կազմավորում՝ իր անձնագրերով եւ համարանիշներով:

Նա դիվանագիտական հարաբերություններ ունի 110 պետությունների հետ եւ մշտական դիտորդի կարգավիճակ՝ ՄԱԿ-ում, ինչը նրան թույլ է տալիս հանդես գալ որպես չեզոք կողմ՝ ռազմական գործողությունների գոտիներում օգնություն ցուցաբերելու հարցում։

Միաբանության հարցերով Հռոմի պապի հատուկ պատվիրակ, կարդինալ Սիլվանո Տոմազին ճեպազրույցում լրագրողներին ասել է, որ նոր կանոնադրությունը չի թուլացնի նրա միջազգային ինքնիշխանությունը։

Սակայն որպես կրոնական միաբանություն՝ այն պետք է մնա Վատիկանի հովանու ներքո, ասել է աշխատանքային խմբի անդամ կարդինալ Ջանֆրանկո Գիրլանդան, որը մշակել է շաբաթ օրը Հռոմի պապի կողմից հաստատված նոր սահմանադրությունը։

Ֆրանցիսկոսը հունվարի 25-ին հրավիրել է արտահերթ ընդհանուր նստաշրջան՝ նոր Մեծ մագիստրոսի ընտրության գործընթաց սկսելու համար:

Վերջին Մեծ մագիստրոսը՝ իտալացի Ջակոմո Դալլա Տորեն, ապրիլին է մահացել։

Նախորդ կանոնադրության համաձայն՝ բարձրագույն ասպետներն ու Մեծ մագիստրոսը պետք է ազնվական ծագում ունենային, ինչը, ըստ բարեփոխիչների, բացառում էր բարձր պաշտոններում ծառայելու հնարավորությունը գրեթե բոլորի համար, բացի եվրոպացիներից։

Նոր սահմանադրությունը վերացնում է ազնվականության կանոնը, ինչպես նաեւ ցմահ Մեծ մագիստրոս ընտրելու ավանդույթը։