Արցախի պետնախարար Ռուբեն Վարդանյանը այսօր հարցազրույց է տվել BBC-ի Hard Talk ծրագրին։
Պատասխանելով լրագրողի կողմից հնչեցված մի շարք հարցերի՝ Վարդանյանն անդրադարձել է նաև ռուս խաղաղապահների մասին հարցին և մասնավորապես նշել․ - «Առաջին հերթին մարդիկ պետք է հասկանան, որ ընդամենը 2000 խաղաղապահ կա, և նրանք ունեն զենք օգտագործելու շատ սահմանափակ մանդատ, և ճանապարհը փակել են ֆորմալ առումով «էկոակտիվիստները», որոնք քաղաքացիական անձինք են։ Առանց պատրանքների, զինվորների քանակը քիչ է, նրանք միայն թեթև զենք ունեն, և կրակելու իրավունք չունեն։ Ահա ինչու, ցանկացած խաղաղապահի նման դեպքերում միշտ շատ դժվար է միջամտել, եթե հակամարտությունը շարունակվում է»։
Առաջին հայացքից ոչինչ չասող ստանդարտ պատասխան է, բայց ենթատեքստերին հետևելով կարելի է հասկանալ, որ Վարդանյանը մասամբ ակնարկել է ՌԴ իշխանություններին՝ լայնացնել խաղաղապահների լիազորությունները (տալ լավ զենք, տալ կրակելու իրավունք, չսահմանափակել նրանց գործողությունները)։
Այսինքն, Վարդանյանի այս պատասխանից կարելի է ենթադրել, որ նա սպասում է ռուս խաղաղապահների կողմից կտրուկ գործողությունների և ակնկալում ՌԴ ղեկավարության աջակցությունն այս հարցում։
Այս ամենին զուգահեռ, ուշագրավ էր նաև այն հանգամանքը, որ չնայած BBC-ի լրագրողի ջանքերին՝ Վարդանյանն այդպես էլ ՌԴ-ի ու մասնավորապես Վլադիմիր Պուտինի հասցեին կոշտ քննադատություն չհնչեցրեց։
Հարցազրույցն ամբողջությամբ կարող եք կարդալ այս հղումով։