Կառավարության հերթական նիստում քննարկվեց շինարարական հրապարակներում նորմերի պահպանման կարգապահությանն ուղղված հարցը։
«Առաջարկում ենք խստացումներ մտցնել, քանի որ այսօր, ըստ գործող օրենքների, շինհրապարակում խախտումների դեպքում սահմանված է նվազագույն աշխատավարձի 50-ապատիկի չափով տուգանք, որն ստեղծում է այն վիճակը, երբ պետք է շինհրապարակը կարգի բերեն և դրա վրա բավականին գումար պետք է ծախսվի, բայց շատ դեպքերում չեն անում ու այդպես անընդհատ վճարում են այդ տուգանքները, որը կրկնակի դեպքում ավելի խիստ պատիժ չի ենթադրում»,-նիստի ժամանակ ասաց Քաղաքաշինության կոմիտեի նախագահ Արմեն Ղուլարյանը։
Նիկոլ Փաշինյանը, անդրադառնալով հարցին պարզաբանեց, որ խնդիրը շինհրապարակներում ստանդարտ սահմանելու մասին է, թե շինհրապարակը ինչ վիճակում պետք է լինի, այնտեղ աշխատողները ինչ վիճակում պետք է լինեն, ինչ հագուստ և անվտանգության միջոցներ պետք է կրեն։
«Այդ թվում՝ մայրաքաղաք Երևանում մենք նախորդ շրջանում տեսանք, թե փոշու ինչպիսի աննախադեպ մակարդակ կա, երբ շինարարության ծավալները շատ մեծ թափ են հավաքել, բայց մյուս կողմից անընդհատ ահազանգեր ենք ստանում և տեսնում ենք, որ փոշու, աղտոտվածության շատ բարձր ցուցանիշներ են արձանագրվել»,-ասաց Նիկոլ Փաշինյանը։
Նա նաև անդրադարձավ պատճառներին, նշելով, որ շինհրապարկներում ստանդարտները չեն պահպանվում և այս հարցում պետք է հետևողական լինեն։
«Բուն շինհրապարակը ինչ վիճակում պետք է լինի և այնտեղ աշխատողներն ինչ տեսք պետք է ունենան, սրանք և՛ անվտանգային, և՛ բնապահպանական, և՛ էսթետիկ նշանակություն ունեն, որոնք պետք է պահպանվեն»,-ամփոփեց Փաշինյանը։
Մանրամասները՝ տեսանյութում։