Լուսաձայնային նռնակները, ինչպես տեսանյութերում ենք տեսել, օդում են պայթել, ոչ թե նախկինի պես մարդկանց մեջ ու մարդկանց ոտքերի վրա։ Այս մասին այսօր MediaHub.am-ի հետ զրույցում ասաց ՔՊ-ական պատգամավոր Տրդատ Սարգսյանը։
Հիշեցնենք, որ նախօրեին Պռոշյան-Դեմիրճյան խաչմերուկում տեղի էր ունեցել բախում ոստիկանների և ակցիայի մասնակիցների միջև։ Ոստիկանները ցուցարարների նկատմամբ լուսաձայնային նռնակ են կիրառել։ Արդյունքում տուժել են թե՛ քաղաքացիական անձինք, թե՛ ոստիկանության ծառայողներ: Բժշկական կենտրոններ են դիմել 60 անձ, որոնցից 39-ը` ոստիկանության աշխատակիցներ: Դիտարկմանը՝ իրականում, թե՛ տեսանյութերում, թե՛ ականատեսների խոսքով՝ հատուկ միջոց լուսաձայնային նռնակներից մի քանիսը ժողովրդի մեջ է կիրառվել, վերջինս պատասխանեց․
«Ոստիկանության գործողությունները համաչափ էին։ Քաղաքացիները հրահանգավորված գնացել են բռնությունների և հրապարակված թվերից էլ երևում է, որ տուժած ոստիկաններն ավելի շատ են, քան քաղաքացիները։ Կրկնում եմ՝ ոստիկանների գործողությունները համաչափ էին, որպեսզի կանխվեին հետագա արյունահեղությունն ու ավելի մեծ մասշտաբի աղետը»։
Դիտարկամը, թե 2018 թվականի հեղափոխության ժամանակ կիրառված հատուկ միջոցներն իշխանությունը հաճախ է շահարկում և երեկ տեղի ունեցածից հետո ընդդիմությունը ևս կարող է ասել, որ իշխանությունը անհամաչափ ուժ է կիրառել ակցիայի մասնակիցների նկատմաբ, պատգամավորն արձագանքեց՝ իրենց ցույցերը խաղաղ են եղել։
«Երեկ խաղաղ չէր»,-ամփոփեց Սարգսյանը։
Նշենք, որ MediaHub.am-ը փորձեց մեկնաբանություն ստանալ նաև պատգամավոր Արփի Դավոյանից, սակայն վերջինս նշեց, որ մեր լրատվամիջոցի հարցերին պատասխանել չի ուզում։ Հիշեցնենք, որ երեկ ակցիայի ընթացքում ոստիկանները լուսաձայնային 5 նռնակ են արձակել։
Լիաննա Թորոսյան