Մի քանի օրից Երևանում տեղի կունենա «Մանկական Եվրատեսիլ» մրցույթը, որի մասնակից պատվիրակություններն արդեն մի քանի օր է, ինչ Երևանում են:
Եվ քանի մոտենում են մրցույթի անցկացման օրերը, տոմսերի վերավաճառները, սպեկուլյանտները, ինչպես նաև այն քաղաքացիները, որոնք արագաշարժ էին կամ իսկապես փոշմանել են (մեկնաբանությունն այստեղ խիստ սուբյեկտիվ է) անցել են կարևոր գործի՝ վաճառում են «Մանկական Եվրատեսիլի» տոմսերը:
MediaHub-ի հարցախույզը ցույց տվեց, որ դա բավականին եկամտաբեր գործ է և անկառավարելի: Այլ կերպ ասած՝ Ֆեյսբուք սոցիալական ցանցում բազմաթիվ քաղաքացիներ վաճառում են տոմսերը՝ չթաքցնելով, որ գնել են այն մի գնով, սակայն վաճառում են մեկ այլ:
Օրինակ, օգտատերերից մեկի գրառմանն արձագանքելով տեղեկացանք, որ տիկինը գնել է վեց տոմս դեկտեմբերի 10-ի համար, սակայն ինչ-ինչ պատճառներով չեն գնալու, այդ իսկ պատճառով վաճառում են: Տիկնոջ խոսքով՝ գնել են հատը 7 հազար դրամով, սակայն ինքը վաճառում է 12 000-ով, քանի որ՝ «խիղճս չի տա ավելի գնով վաճառեմ, թեև ուրիշները նենց գներ են դնում...»:
Ի դեպ, տիկնոջ մոտ առկա վեց տոմսից միայն երկուսն էին մնացել, այլ կերպ ասած՝ նա բավականին լավ եկամուտ է ստացել տոմսերի պարտադրված կամ պլանավորած վերավաճառքից:
Մեկ այլ օգտատեր էլ նշեց, որ հինգ տոմս ուներ, որոնք ևս յոթ հազարով էր գնել, բայց քիչ առաջ բոլորը սպառեց՝ «ցանկացողները շատ են, մեծ ա պահանջարկը»: Հետաքրքրվեցինք՝ ինչքանո՞վ է վաճառել տոմսերը, անկեղծ պատասխանեց՝ հատը 15 000: Եվ զարմացավ, որ մենք զարմացանք այդ փաստին:
Ի դեպ, կազմակերպիչները զգուշացնում էին նաև, որ կեղծ տոմսեր էլ են շրջանառվում: Սոցիալական ցանցերի միջոցով տոմսեր ձեռք բերելը, ստացվում է, նաև ռիսկային է, քանի որ միայն մրցույթի օրը, համերգային համալիր մտնելուց պարզ կդառնա՝ ձեր բախտը բերել է, իսկական տոմսն եք գնել, թե՞ և՛ փողը կորցրել, և՛ երկար սպասված միջազգային միջոցառմանը մասնակցելու հնարավորությունից զրկվել:
