Դրամը բարդ ճանապարհ անցավ, սակայն հաղթահարեց բազում ճգնաժամային իրավիճակներ․ ԿԲ նախագահի ելույթը
Հայաստանի Հանրապետության կենտրոնական բանկի նախագահ Մարտին Գալստյանը ելույթ ունեցավ Դրամի 30-ամյակին նվիրված միջոցառմանը։ Հայտնում են ԿԲ մամուլի ծառայությունից։
Միջոցառման մասնակիցներին շնորհավորելով ազգային արժույթի 30-ամյակի կապակցությամբ, ԿԲ նախագահը նշեց, որ մեր հայրենակիցների տարբեր սերունդների նվիրական աշխատանքի շնորհիվ ՀՀ ազգային արժույթն այսօր Հայաստանի անկախության և պետականության կարևորագույն խորհրդանիշներից մեկն է:
Մարտին Գալստյանը հիշեցրեց, որ 1993 թ․ նոյեմբերի 22-ին, շատ ծանր պայմաններում դրամը դրվեց շրջանառության մեջ, անցավ բարդ ճանապարհ, սակայն հաղթահարեց բազում ճգնաժամային իրավիճակներ։ Այսօր դրամը կանգուն է՝ շնորհիվ մեր երկրում հետևողականորեն իրականացվող մակրոտնտեսական պատասխանատու կառավարման, և հայ հանրությունը լիովին վստահում է իր արժույթին։
Կենտրոնական բանկի նախագահը շեշտեց, որ որպես ինքնակրթվող հաստատություն՝ ԿԲ աշխատակիցները շարունակաբար ձգտում են գերազանցության՝ առաջատար հետազոտությունների և նորարարական լուծումների իրագործման միջոցով, հանդես են գալիս ապագային միտված նախաձեռնություններով՝ պահպանելով տնտեսական կայունության հանձնառությունը:
Մարտին Գալստյանը վստահեցրեց, որ Կենտրոնական բանկը շարունակելու է լինել վստահելի գործընկեր մեր հանրության, բիզնեսի և կառավարության համար՝ ապահովելով գների և ֆինանսական կայունությունը:
«Մենք հավատարիմ ենք մնում տնտեսական կայունության ու բարեկեցության ապահովմանը նպաստելու մեր առաքելությանը, և մենք անելու ենք ամենը, որպեսզի իրացնենք մեր երկրի և ամեն մի դրամի ներուժը», ասաց ԿԲ նախագահը:
