Բրիտանացի երկարակյաց կինը տոնել է հերթական տարեդարձը եւ նշել ալկոհոլային այն ըմպելիքը, որը նպաստել է նրա երկարակեցությանը, տեղեկացրել է Sussex World պարբերականը։
Սթեյնինգ քաղաքում (Արեւմտյան Սուսեքսի կոմսություն) ապրող Մարջորի Ռաթերը 102 տարեկան է։ Նա ծննդյան օրը նշել է հուլիսի 7-ին Croft Meadow տարեցների տանը։ Նրա պատվին ծերերի տան աշխատողները երեկույթ էին կազմակերպել։
Երկրորդ համաշխարհային պատերազմի տարիներին Ռաթերը հեռախոսավարուհի էր, իսկ ավելի ուշ ամուսնու հետ միասին բնակություն է հաստատել Էլսթրի գյուղակում (Հարթֆորդշիրի կոմսություն), որտեղ երկու երեխա են ունեցել։ Իր երկարակեցության գաղտնիքը կինը ներկայացրել է լրագրողներին։ 102-ամյա բրիտանուհու կարծիքով՝ ամենագլխավորը «կյանքն է մաքուր մտքերով, մեկ-մեկ էլ՝ մի քիչ վիսկի»։
Croft Meadow մենեջեր Քարմեն Ֆլուերասը պատմել է, որ աշխատակիցները շատ են սիրում Ռաթերին, որովհետեւ նա միշտ կարողանում է զվարճացնել բոլորին։ «Շատ հաճելի է, որ մենք կարողացանք նրա համար այսպիսի տոն կազմակերպել»,- ասել է նա։