Խորհրդարանում տեղի ունեցող խայտառակությունները, իրար վրա շիշ նետելն ու միմյանց «աչք» հանելը հանրությունից թաքցնելու համար ՔՊ-ականները նոր խեղկատակ որոշում են ընդունել:
Այսօր պարզվեց, որ օթյակից, որտեղից լրագրողները հետևում են ԱԺ նիստի դահլիճին, պատգամավորներին հեռախոսով նկարել այսուհետ չի կարելի: Աշխատակազմից ՊՊԾ աշխատակիցներին հրահանգել են՝ լրագրողներին բացառապես տեսախցիկով նկարելու թույտվություն տալ:
MediaHub-ի աղբյուրի խոսքով՝ ՔՊ-ականներն այս որոշումն ընդունել են ընդդիմության ԱԺ վերադառնալուց հետո: Բանն այն է, որ երբ ընդդիմության ու իշխանականների միջեւ «մարտական» գործողություններ են սկսվում, ժամանակի առումով տեխնիկապես հնարավոր չէ հասնել օթյակ ու նկարել պատգամավորների ոչ ադեկվատ վիճակն ու խայտառակ պահվածքը:
Այսպես ՔՊ-ականները ճղճիմ խորամանկության են դիմել՝ հերթական սանկցիան կիրառելով լրագրողների գործունեության նկատմամբ: ՊՊԾ աշխատակիցներն այս առնչությամբ հրաժավում են մեկնաբանություն տալ՝ ուղղորդելով բոլոր հարցերը ճշտել աշխատակազմից: Սակայն ԱԺ աշխատակազմի ղեկավար Վահան Նարիբեկյանին խորհրդարանում այսօր չհանդիպեցինք, մեր զանգերն էլ մնացին անպատասխան: Իսկ ժամանակներ կային, երբ լրագրողներն ու պատգամավորները աշխատում էին նույն դահլիճում ու խաղաղ հարևանություն էին անում…
Լիա Սարգսյան