Իտալիայում հորդառատ անձրեւների հետեւանքով առնվազն 10-ը մարդ մահացել, չորսը, այդ թվում՝ երկու երեխա, անհետ կորել են։ Առնվազն 50 մարդ վիրավորվել է, հայտնում է իտալական La Repubblica օրաթերթը։

Մահացածների թվում կա մարդ, ով խեղդվել է մեքենայում, ութամյա երեխա, որին որոնում են փրկարարները. երեխան դուրս է սայթաքել մոր գրկից եւ ջրի հոսքը քշել է նրան։ Տեղական որոշ հրապարակումների համաձայն՝ Օստրա կոմունայի մոտ հրշեջ ջոկատը փրկել է երեխային։

Վատ եղանակից ամենաշատը տուժել են Սենիգալիայի շրջանները։ Մարկեի շրջանի քաղաքացիական պաշտպանության եւ տարածքային անվտանգության տնօրեն Ստեֆանո Ստեֆանին նշել է, որ երկու-երեք ժամվա ընթացքում մոտավորապես 420 միլիմետր անձրեւ է տեղացել, ինչը տարածաշրջանում տեղումների մեկ տարվա ցուցանիշի կեսն է։ Միաժամանակ չի բացառվում, որ առաջիկայում տարածաշրջանում կրկին անձրեւներ տեղան։

Միսա գետը սկսել է վարարել՝ հասնելով առավելագույն սահմանագծին հինգշաբթի՝ սեպտեմբերի 15-ի ուշ երեկոյան։ Իշխանությունները տեղի բնակիչներին խնդրել են բարձրանալ տների վերին հարկեր, դուրս չգան փողոց եւ չօգտվեն մեքենաներից։ Այժմ գետը կամաց-կամաց նահանջում է։ Բարբարա քաղաքի դպրոցներում դասերը չեղյալ են հայտարարվել։ Մարկեում աշխատում է ավելի քան 300 փրկարար: