Երեկ Գյումրիի Թատերական հրապարակի եղևնիներից մեկի վրա բարձրացրած տղամարդը, որն ավելի ուշ ինքնահրկիզվել էր, Երևան է տեղափոխվել՝ բուժումն այստեղ շարունակելու։ Այս մասին այսօր MediaHub.am-ին փոխանցեց «Գյումրի» ԲԿ փոխտնօրեն Արմեն Խաչատրյանը։

«Հիվանդը մեզ մոտ է բերվել դեմքի, պարանոցի, շնչուղիների, իրանի տարբեր հատվածների տարբեր աստիճանների այրվածքներով, մարմի մոտ 40 տոկոս այրվածքով։ Մեզ մոտ շոկով է եկել, որոշակի դեղամիջոցներից հետո կայունացել է վիճակը»,-ասաց նա։

Խաչատրյանի խոսքով՝ տղամարդը մասնագիտացված կլինիկայում է։

«Հիմա չգիտեմ, թե ինչպես է վիճակը, բայց իսկզբանե կյանքին վտանգ էր սպառնում»։

Հիշեցնենք, որ ավելի վաղ հայտնել էինք, որ Գյումրիում երեկ մի քաղաքացի, Սայաթ-Նովա 4 հասցեի մոտ բարձրացել էր եղևնու ծառի վրա և սպառնում էր կախվելու միջոցով ինքնասպանություն գործել՝ պահանջելով, որ դեպքի վայր գա Շիրակի թեմի առաջնորդ Միքայել եպիսկոպոս Աջապահյանը։

Սրբազանը MediaHub.am-ին հայտնել էր, որ հոգևորական է գնացել այնտեղ՝ տղամարդու հետ բանակցելու։ Մի քանի ժամ տևած բանակցություններից հետո տղամարդը դիմեց ինքնահրկիզման:

Լիաննա Թորոսյան