Հունիսի 9-ին Երևանի Հանրապետության հրապարակում անցկացված հանրահավաքում Բագրատ Սրբազանը հնչեցրեց կարևոր որոշման մասին, այն է՝ 96 ժամ տալով Նիկոլ Փաշինյանին:
Ի՞նչ հանգուցալուծում կունենա Սրբազան շարժումը:   

MediaHub-ի հետ զրույցում քաղաքագետ Արման Աբովյանը նշեց, որ շարժումը արդեն արել է ամենակարևորը՝ կարողացել է կասեցնել իշխանական գրեթե բոլոր նարատիվները, այսինքն այն, թե իշխանափոխությունը ընդդիմությանը աթոռներին հասնելու նպատակ է։

«Ես նույնիսկ շարժում չեմ համարում, քանի որ դա քաղաքական նորմ է, այլ սա համարում եմ գործընթաց»,- նշեց նա:

Անդրադառնալով ՔՊ-ական պատգամավորների այսօրվա հայտարարություններին, որոնք, մեղմ ասած, քաղաքական մշակույթից հեռու են, Աբովյանն ասաց. «Այդպիսի սրամտությունները թող պահեն մեկ այլ միջավայրում օգտագործելու համար։ Ես բոլորին էլ խորհուրդ կտամ՝ իշխանամետ պատգամավոր լինի, ընդդիմադիր, թե չեզոք, հանգիստ վերաբերվել անխուսափելի պրոցեսին։ Ավելին, իրենց այդ կատակներով բացահայտ ցույց են տալիս իրենց անհանգստությունը․ թող չանհագստանան, այլևս իրենցից ոչ մի բան կախված չէ»։

Հավելելով՝ նախկին պատգամավորը նշեց, որ գործընթացն այլևս անդառնալի է, և նույնիսկ իշխանափոխության մասին չէ խոսքը, այլ նրա մասին է, որ հայ ժողովուրդը չի ուզում դառնալ գործող վարչակազմի թուրք-ադրբեջանական տանդեմի «մատերիալ», որը հենց իրենց սիրած խոսքն է։

«Այս գործընթացը չի մարելու, որովհետև այս գործընթացը կապ չունի լոկ անձանց հետ: Երբ իշխանությունը փորձում է այն անձնավորել, օրինակ՝ Գառնիկ Դանիելյանին կամ Բագրատ Սրբազանին, իրենք դրանով գործընթացի բնույթը չեն հասկանում»,- շեշտեց մեր զրուցակիցը՝ հավելելով, որ գործընթացը կշարունակվի այնքան ժամանակ, մինչև կհասնի իր առջև դրված նպատակին։

Վիկա Աբգարյան