Ազգային ժողովը շարունակում է քննարկել 2023 թվականի պետական բյուջեի մասին օրենքի նախագիծը։
Կենտրոնական բանկի նախագահ Մարտին Գալստյանը հայտարարեց, որ 2023 թվականի համար ևս նախանշվել է տնտեսական աճի 7% մակարդակ։
«2023 թվականի համար նախանշված բարձր տնտեսական աճի հիմքում ընկած է արտադրողականության և մրցունակության աճի ապահովման համար անհրաժեշտ առանցքային ներդրումները, այդ թվում պետական ներդրումների մասնաբաժնի էական մեծացումը և արտահանման աճի համար կայուն հիմքերի ձևավորումը»,-ընդգծեց Գալստյանը:
Ըստ նրա՝ 2023 թվականին ևս հարկաբյուջետային քաղաքականությունը կշարունակի սահուն կոնսոլիդացիայի իրականացումը՝ նպաստելով պարտքի բեռի նվազեցմանը։
«2023 թվականին նախատեսվում է էականորեն մեծացնել կապիտալ ծախսերի կշիռը ՀՆԱ-ում՝ հասցնելով 5.9%-ի և նվազեցնել ընթացիկ ծախսերը՝ հասցնելով 21.9%-ի»,-ասաց ԿԲ նախագահը։ Այսպիսով, 2023 թվականին կապիտալ ծախսերի ավելացման հաշվին պետական բյուջեի պակասուրդը կավելանա, կազմելով ՀՆԱ-ի 3.1%-ը, իսկ հարկաբյուջետային քաղաքականությունը կլինի չեզոք՝ նպաստելով նաև պարտքի բեռի 1% -ով նվազմանը, և կկազմի շուրջ 49.7%։ Մանրամասները՝ տեսանյութում։