Ինչպես հայտնել էր Գագիկ Շամշյանը, այսօր՝ ժամը 06։15-ի սահմաններում Տավուշի մարզի գյուղերից մեկի բնակիչ 55-ամյա կինը ահազանգել է Ոստիկանության Նոյեմբերյանի բաժին և հայտնել, որ անհայտ անձը գաղտնի մտել է իր տուն իր հետ հայերեն խոսելով ասել, որ ինքը ադրբեջանցի է։ Վերջինս ոստիկաններին հայտնել է, որ ժամը 04։00-ի սահմաններում անծանոթ տղամարդը մտել է իր տուն, իր կամքին հակառակ սեռական հարաբերություններ է ունեցել իր հետ, ապա ձեռքերով հարվածել իր մարմնի տարբեր մասերին և իրենից գողացել 1-ական ոսկյա և արծաթյա մատանիներ, 1 զույգ ոսկյա ականջօղեր, ապա հայերեն ասել, որ ինքը հայ չէ, ադրբեջանցի է և, որ կատարվածի մասին պետք է լռի ու աղմուկ չբարձրացնի, ապա դիմել է փախուստի։
MediaHub-ի տեղեկություններով դեպքը տեղի է ունեցել Նոյեմբերյան համայնքի Դովեղ գյուղում։ 28-ամյա Արտյոմ Ղազարյանը բռնաբարել և թալանել է համագյուղացի Հասմիկին։
Այս պահին տուժողը գտնվում է հոգեբանական կայուն վիճակում։
Ոստիկանության Նոյեմբերյանի բաժնի քրեական հետախուզության և համայնքային ոստիկանության բաժանմունքների ծառայողները՝ ձեռնարկելով օպերատիվ-հետախուզական միջոցառումներ հայտնաբերել ու Ոստիկանության Նոյեմբերյանի բաժին են տեղափոխել Տավուշի մարզի բնակիչ 28-ամյա Արտյոմ Ղազարյանին։
Վերջինս խոստովանել է իր կողմից կատարված արարքը։ Նրա մոտ հայտնաբերվել են նաև տուժողից գողացված զարդերը։