Մեր նպատակը պետք է լինի Հայաստանի տարածքային ամբողջականության վերականգնումը, ադրբեջանիցներին մեր տարածքներից դուրս շպրտելը և Արցախի ազատագրումն ու ինքնորոշման գաղափարը։ Այդ մասին «Եռաբլուր» զինվորական պանթեոնում լրագրողների հետ զրույցում ասաց ԱԺ «Հայաստան» խմբակցության ղեկավար Սեյրան Օհանյանը։
Նրա խոսքով՝ այդ նպատակն իրականացնելու համար պետք է կերտենք մեր պետության ռազմական հզորության կետերը՝ տարածք, բնակչություն, տնտեսություն։
«Մեր ժողովուրդն ունի այդ ներուժը։ Մենք Շուշիի ազատագրման օրն այսօր այլ իրավիճակում ենք տոնում։ Շուշին չկա, Արցախի մի մասն օկուպացրել են ադրբեջանիցները։ Այսօրը մեզ համար պատասխանատվության օր պետք է լինի»,- ասաց Օհանյանը։
Ընդդիմադիր խմբակցության ղեկավարը նկատեց՝ խելացի գործողությունների դեպքում մենք կարող ենք վերականգնել մեր բանակը և պայքարել մեր ինքնության համար։
«Այս իշխանությունները ասում են, որ մենք թույլ ենք, որովհետև չեն կարողանում ճիշտ գնահատել ստեղծված ռազմաքաղաքական իրավիճակը, ներքին և արտաքին սպառնալիքները։ Այս իշխանությունը բարոյազրկում է պետականությունը, ինքնիշխանությունը, բանակը, եկեղեցին, հաղթանակները և դրանք կերտածներին»,- նշեց Օհանյանը։
Անդրադառնալով «հինգերորդ շարասյան» մասին իշխանությունների հայտարարություններին՝ Սեյրան Օհանյանն ասաց, որ խելացի պետության մեջ, եթե լինում են այլ երկրների գործակալներ, ոչ թե միանգամից հայտնում են այդ գործակալների մասին, այլ փորձում են այդ գործակալների հետ աշխատել և այդ ամենն ուղղել հակառակ կողմի վրա։
«Եթե կա հինգերորդ շարասյուն, կան դավաճաններ, թող ներկայացնեն՝ ովքեր են։ Այն, որ պարտությունը տեղի է ունեցել այս իշխանության օրոք, իրավիճակի համար պատասխանատու են իշխանության բոլոր թևերը, միանշանակ է։ Դատաիրավական ամբողջ համակարգը պատերազմի ժամանակ մատը մատին չի խփել օրինականություն հաստատելու համար, դա էլ է միանշանակ»,- նշեց նա։
Մանրամասները՝ տեսանյութում։