Արցախի ժայռերի ու լեռների ուղղությամբ արդեն 2 օր է ադրբեջանական կողմը կրակում է։

Արցախից էլ այսօր պաշտոնապես հայտնեցին՝ Ասկերանի, Մարտակերտի եւ Մարտունու շրջանների օկուպացված տարածքներում տեղակայված Ադրբեջանի ԶՈւ ստորաբաժանումները մարտի 2-ին եւ մարտի 2-ի լույս 3-ի գիշերը խախտել են հրադադարը` կիրառելով հրաձգային զինատեսակներ։ 

Ասկերանի շրջվարչակազմի ղեկավար Համլետ Ապրեսյանը MediaHub-ի հետ զրույցում ասում է՝ երեկ գիշերն էին կրակում Պաշտպանության բանակի դիրքերի ուղղությամբ։ 

«Այս կողմերում մենք գյուղատնտեսական աշխատանքներ չենք անում, բնակավայրեր էլ չունենք։ Հիմա հանգիստ է»,- նշեց նա։

Չի պատկերացնում, թե ինչու են սկսել կրակել այն օրերին, երբ ադրբեջանական կողմը, կարծես թե, Արցախի իշխանությունների հետ ուղիղ բանակցությունների է դուրս եկել, համենայնդեպս այդպես են ակնարկում պաշտոնական աղբյուրները։ 

«Չեմ կարող ասել, թե ինչ միտում ունեն։ Ոչ մի խաղաղություն էլ չի լինի։ Ինչ վերաբերում է բանակցություններին, դրանք չկան, ուղղակի շփումներ են՝ ենթակառուցվածների հետ կապված»,-ասաց Ապրեսյանը:

Արցախն Ադրբեջանի հետ ինտեգրման մասին են խոսում ադրբեջանական աղբյուրները, Ապրեսյանը շեշտում է՝ արցախցիները խաղաղ համակերցության պայմաններ չեն տեսնում ադրբեջանցիների հետ։ 

«Դա իրենց ցանկությունն է, արցախցիները չեն տեսնում ադրբեջանցիների հետ խաղաղ ապրելու պայմաններ։ Եթե լինի կարգավիճակի հստակեցում, որպես հարեւաններ կարող ենք ապրել, աշխատել, բայց ենթարկվել ու լինել Ադրբեջանի կազմում՝ չենք պատկերացնում»,-հստակեցրեց նա:
Արդեն մի քանի ամիս է Արցախը Հայաստանին կապող միակ ճանապարհը փակ է։

Ասում էին՝ Ռուբեն Վարդանյանը հեռանա իշխանությունից՝ կբացեն, մեր զրուցակիցը հարցադրում է հնչեցնում՝ բա հիմա ինչո՞ւ չեն բացում։ 

«Ճանապարհը բացվե՞ց, ո՛չ։ Ճիշտն ասած չեմ ուզում խորանալ այդ թեմաների մեջ, քանի որ իմ լիազորությունների մեջ չի մտնում։ Որպես արցախցի կարող եմ ասել՝ մենք չենք պատրաստվում լինել Ադրբեջանի կազմում, պայքարելու ենք մինչեւ վերջ»։ 

Չգիտի, թե որքանով են ճիշտ տեղեկությունները, որ Հայաստանի իշխանություններն Արցախը հանձնել են Ադրբեջանին, բայց վստահ ասում է՝ արցախցիները չեն հանձնվելու։

«Իրենք հանձնել են, մենք չենք հանձնվել, պայքարել ենք ու պայքարելու ենք։ Իշխանություններն են դա արել, բայց հայ ազգը հո մեզ հետ է։ Հայաստանի իշխանությունը Հայաստանը չի, հայ ազգը մեզ հետ է, ու կարծում եմ՝ բոլորն էլ համակարծիք են, որ պիտի պայքարենք մինչեւ վերջ»,-հավելեց մեր զրուցակիցը։

Լիա Սարգսյան