Պորտսմութի համալսարանի մասնագետների թիմն անքուն գիշերվանից հետո թարմանալու միջոց է հայտնաբերել։ Physiology & Behavior ամսագրում հրապարակված հետազոտությունը ցույց է տվել, որ 20 րոպե վարժությունը կարող է բարելավել ուղեղի աշխատանքը: 

Երկու փորձերին մասնակցել է 24 մարդ (յուրաքանչյուրում 12-ը)։ Առաջինում հեղինակները կենտրոնացել են կոգնիտիվ ունակությունների վրա քնի փոքր պակասի ազդեցության բացահայտման վրա, իսկ երկրորդում՝ ամբողջ անքուն գիշերվա և ուղեկցող հիպոքսիայի ազդեցության վրա:

Առաջին թեստի ժամանակ փորձարկվողներին թույլատրվել է երեք օր շարունակ քնել ոչ ավելի, քան հինգ ժամ մեկ գիշերվա ընթացքում: Ամեն առավոտ նրանց տրվում էր յոթ առաջադրանք, որոնք պետք է կատարեին հանգստի ժամանակ, այնուհետև հեծանիվ վարելուց հետո: Բոլոր մասնակիցներին առաջարկվել է գնահատել իրենց տրամադրությունը և զգոնությունը՝ նախքան առաջադրանքները կատարելը:

Պարզվել է, որ երեք գիշեր աննշան քնի պակասը տարբեր աստիճանի է ազդել փորձարկվողների ճանաչողական կարողությունների վրա։ Գիտնականները դա բացատրել են նրանով, որ որոշ մարդիկ ավելի դիմացկուն են թեթև ու չափավոր քնի պակասի նկատմամբ:

Այնուամենայնիվ, չափավոր ինտենսիվության վարժությունները բարելավել են կատարողականը բոլոր մարդկանց մոտ:

Երկրորդ փորձի ժամանակ մասնակիցները մի ամբողջ գիշեր անցկացրել են առանց քնի, իսկ հետո տեղավորվել են թթվածնի ցածր մակարդակով միջավայրում: Չնայած թթվածնի մակարդակի նվազմանը, վարժությունը նաև խթանել է կոգնիտիվ գործառույթը։