Երբ ազդարարվեց, որ ուրբաթ երեկոյան Նիկոլ Փաշինյանը հարցազրույց է տալու Հանրային հեռուստատեսությանը, շատերին թվաց, թե մեկ օրում էական բան է փոխվել: Բանն այն է, որ ընդամենը մեկ օր առաջ, կառավարության նիստում, Փաշինյանը երեսուն րոպե խոսել էր հայ- ադրբեջանական հարաբերությունների կարգավորման գործընթացի, Ալիևի ագրեսիվ պահվածքի մասին:
Ուրբաթ օրը նորություն չլսեցինք:
Ուղղակի այս անգամ Փաշինյանը նույն բանի մասին խոսեց երկու ժամից ավելի: Զարմանալի է, որ նրա աշխատակազմում որևէ մեկը վարչապետին խորհուրդ չի տալիս նման երկար հարցազրույցներ չտալ ու այդպիսով կարևոր ուղերձները չթողնել անիմաստ նախադասությունների ստվերում:
Ինչևէ, գանք բովանդակությանը: Փաշինյանն ասել է, որ Հայաստանն իր առաջարկներն է ներկայացրել խաղաղության պայմանագրի տեքստի վերաբերյալ, նաև Վաշինգտոնում տեղի ունեցած հանդիպման ընթացքում հայկական պատվիրակությունը իր առաջարկները, տեքստի տարբերակը ներկայացրել է քննարկման:
Եթե իսկապես Փաշինյանը ճիշտ է ասում, ապա կարծում ենք հայկական տարբերակի գոնե սկզբունքները պետք է հանրայնացվեն, ճիշտ այնպես, ինչպես վարվել է Բաքուն: Փաշինյանի մյուս կարևոր արձանագրումն այն էր, որ խաղաղության պայմանագիրը պետք է միջազգային երաշխավոր կամ երաշխավորի ինստիտուտ ունենա։
Իհարկե, սրանից էլ բխում է, որ հայկական կողմը պետք է հստակեցնի իր օրակարգը, կողմնորոշվի՝ ինչպե՞ս է պատկերացնում հայ- ադրբեջանական հարաբերությունների կարգավորումը՝ փուլայի՞ն, թե՞ փաթեթային տարբերակով, որովհետև միայն սրանից հետո կարող է հստակեցվել երաշխավորի կամ երաշխավորների հարցը:
Ադրբեջանի գործողություններից արցախահայերի հանդեպ նոր ցեղասպանության նախապատրաստության տպավորություն է գալիս. սա էլ է Փաշինյանի արձանագրումը ու այն միանգամայն ճիշտ է: Այլ խոսքով, կարևորվում է Արցախում ռուսական խաղաղապահ առաքելության դերը:
Այլ խնդիր է, որ պաշտոնական Երևանն ամեն բան չպետք է թողնի միայն Մոսկվայի ուսերին: Առաջին հերթին Ռուսաստանի Դաշնությունը պետք է տա հարցի պատասխանը, թե ռուսական առաջարկները դեռ շրջանառվո՞ւմ են, ընդգծել է վարչապետը:
«Մենք ասել ենք, որ դա մեզ համար ընդունելի է», - հարցազրույցի ժամանակ ասել է Նիկոլ Փաշինյանը:
«Մենք հարցնում ենք, և մենք ստացել ենք պատասխան, բայց ես կարծում եմ՝ քանի որ թեման դարձել է հրապարակային ՌԴ նախագահի արած հայտարարությունից հետո, ես Ձեր հարցը վերագրում եմ Ռուսաստանի Դաշնությանը, և թող ՌԴ-ն հրապարակային պատասխանի»,- ասել է Փաշինյանը՝ տպավորություն ստեղծելով, որ նա ողջ պատասխանատվությունը բացառապես Ռուսաստանի վրա բարդելու ցանկություն ունի:
Վահրամ Բագրատյան