Այսօր պետք է տեղի ունենար Նիկոլ Փաշինյանի փակ հանդիպումը Ազգային ժողովի «Քաղաքացիական պայմանագիր» խմբակցության պատգամավորների հետ։ MediaHub-ի հավաստի տեղեկություների համաձայն՝ Փաշինյանը, սակայն, այսօրվա հանդիպումը չեղարկել է՝ անհայտ պատճառներով։
Ի զարմանս մեզ, ՔՊ-ական պատգամավորներն այսօր մեկ մարդու պես Ազգային ժողովում էին, կանայք՝ զուգված-զարդարված, տղամարդիկ՝ լրջագույնս պատրաստված։ Հավանաբար այս հատուկ պատրաստվածությունը պայմանավորված էր հենց Փաշինյանի այցով։
Լրագրողները փորձում էին հասկանալ՝ արյդո՞ք Փաշինյանի հետ շտապ հանդիպումը պայմանավորված էր «ՔՊ» կուսակցության վարչության անդամի ընտրության արդյունքների խայտառակ պատկերով։ ՔՊ-ական պատգամավորներն ամեն կերպ փորձում էին խուսափել հարցից, մասնավորապես, թե ինչպես է եղել, որ ձայների վերահաշվարկի արդյունքում վարչության անդամների փոփոխություն է եղել։ Այսօր մամուլն էր գրել, որ վերահաշվարկից հետո ԱԺ համանուն խմբակցության ղեկավար Հայկ Կոնջորյանն ու ՀՀ փոխվարչապետ Համբարձում Մաթևոսյանը դուրս են մնացել վարչության կազմից, քանի որ պատգամավոր Արսեն Թորոսյանի ու ԱԻ նախարար Արմեն Փամբուխչյանի ստացած քվեներն ավելի շատ են եղել։ Հետևաբար նրանք էլ անցել են վարչություն։
ՔՊ-ականները խուսափում էին անգամ հաստատել այն փաստը, որ վերահաշվարկ եղել է: Սակայն նրանցից մի քանիսը ԱԺ կուլուարներում MediaHub-ի հետ զրույցներում ակամայից հաստատեցին դա՝ նշելով, որ կոնկրետ իրենք չեն բողոքարկել արդյունքները:
Ի դեպ, մեզ այդպես էլ չհաջողվեց պարզել, թե ՔՊ-ականների հետ փակ հանդիպումը չեղարկվե՞լ է, թե՝ հետաձգվել: Այն, որ Փաշինյանն ամեն ինչ միանձնյա է որոշում հայտնի փաստ է, այնպես որ սպասել, թե նա ՔՊ-ից որևէ մեկին բացատրություն կտար հանդիպման չկայանալու մասով անշնորհակալ գործ է:
Լիա Սարգսյան