Ավելի վաղ հայտնել էինք, որ Ադրբեջանի կողմից Արցախը Հայաստանին կապող միակ ճանապարհի արգելափակման հետևանքով փաստացի շրջափակված են Շուշիի շրջանի Մեծ Շեն, Հին Շեն, Եղծահող և Լիսագոր համայնքները:
MediaHub.am-ի հետ զրույցում համայնքապետերը հայտնեցին, որ բնակիչներ կան, որոնք չեն կարողանում գյուղ գալ և կան հյուրեր, որ չեն կարողանում դուրս գալ գյուղերից։
Լիսագոր գյուղի ղեկավար Գագիկ Նասիբյանը պատմեց, որ ինքն էլ Ստեփանակերտում է և գյուղ վերաադառնալ չի հաջողվել իրեն։
«Մի քանի օր առաջ Ստեփանակերտում վիրահատվել էի, երեկ արդեն պետք է գյուղ գնայի, բայց չկարողացա, ճանապարհը փակ էր, հնարավոր չէր, մնացի այստեղ»,- MediaHub-ի հետ զրույցում ասաց նա։
Համայնքապետը փոխանցեց, որ համայնքում խուճապ չկա, գյուղում նաև սննդի խնդիր չկա։
«Ամեն ինչ կարգավորվող է, եղածը բավարար է։ Խաղաղապահները, կարծում եմ, իրենց առաքելությունը կկատարեն ու խնդիրը հուսով եմ՝ շուտ կլուծվի»։
Հիշեցնենք, որ արդեն մեկ օր է՝ ադրբեջանցի, իբրև թե, բնապահպանները փակել են Լաչինի միջանցքը՝ դժգոհելով, որ նախօրեին իրենց Դրմբոնի և Կաշենի հանքավայրերում դիտարկում անցկացնելու հնարավորություն չի տրվել։ Իրավիճակը լարված է. ՀՀ և Արցախի իշխանությունները հայտարարում են, որ Արցախը հումանիտար աղետի շեմին է և միջազգային հանրությունն անհապաղ պետք է քայլեր ձեռնարկի:
Լիաննա Թորոսյան