Աջափնյակ վարչական շրջանի ղեկավարի երկու տեղակալները՝ Հովսեփ Աղազարյանն ու Արտակ Հակոբյանը ևս այսօր պաշտոնից ազատման դիմումներ են ներկայացրել։ Այդ մասին լուրը MediaHub.am-ի հետ զրույցում հայտնեց Հովսեփ Ազաղարյանը։
Հիշեցնենք, որ ավելի վաղ հայտնել էինք՝ աշխատանքից ազատման դիմում է ներկայացրել Աջափնյակ վարչական շրջանի ղեկավար Սասուն Մկրտումյանը։
«Քաղաքական թիմի որոշում է եղել, որ մենք ազատման դիմումներ ներկայացնենք»,- ասաց Աղազարյանը։ Մեր հարցին, թե կարո՞ղ ենք ենթադրել, որ ՔՊ-ն զենքերը վայր է դնում այդ վարչական շրջանում, Աղազարյանը պատասխանեց՝ ասելով, որ նոր թաղապետը ևս հավատարիմ է լինելու ՔՊ գաղափարախոսությանը։ Ճշտող հարցին, թե արդյո՞ք նոր թաղապետը ևս ՔՊ-ից է լինելու, Հովսեփ Աղազարյանը խուսափողական պատասխան տվեց՝ ասելով, որ վաղը կհայտարարվի նոր թաղապետի անունը։
«Վաղը կասեն, էլի, եկեք ես փակագծեր չբացեմ։ Այս գործընթացին ես ինքս մասնակցություն չեմ ունեցել, թիմի որոշում է եղել, որը և ընդունել եմ, հիմա չեմ ուզի անուն ասել»,- նշեց նա։
Իսկ թե ինքն ի՞նչ գործունեություն է ծավալելու, Աղազարյանը դեռևս չգիտի։ Զարմանալի է, որ նա ավելի լավ է տեղեկացված Սասուն Մկրտումյանի հետագայից։ Թեև փակագծեր չբացեց, բայց և այնպես, Հովսեփ Աղազարյանը նկատեց՝ Մկրտումյանը շատ լավ մասնագետ է և ավելի լավ պաշտոնի է արժանի։ Հարցին, թե արդյոք պա՞րզ է՝ ինչ պաշտոնի է նշանակվելու Մկրտումյանը, Հովսեփ Աղազարյանը պատասխանեց՝ փակագծեր չեմ կարող բացել։
Նարե Գևորգյան