Ադրբեջանում ակտիվորեն սկսել են տեղեկատվություն տարածել, իբրև թե, Ադրբեջանի կառավարության միջոցներով են Բերձորի և Աղավնոյի տեղահանված ընտանիքներին փոխահատուցում տալիս։ Ադրբեջանը այս տեղեկատվությունը փորձում է տարածել տարբեր խողովակներով։ 

Մասնավորապես, ադրբեջանական «Ժողովրդավարություն և բարեկեցություն» կուսակցության նախագահ Գուբադ Իբադօղլուն ևս ասել է, որ Ադրբեջանի իշխանությունները, իբր, փոխհատուցում են վճարել Բերձորում և Ահավնոյում իրենց տները լքած հայ ընտանիքներին։ 

MediaHub.am-ը այս հարցի վերաբերյալ զրուցեց Բերձորի քաղաքապետ Նարեկ Ալեքսանյանի հետ։

«Սա տեղահանվածների, առահասարակ՝ հայերի վրա հոգեբանական ազդեցություն գործելու համար են տարածում։ Դրամական փոխհատուցումը կառավարության կողմից Կարմիր խաչի միջոցով տրված օգնությունն է։ Ինչ վերաբերում է տների հետ կապված փոխհատուցմանը, ապա ՀՀ կառավարության որոշում կա բոլոր տեղահանվածների մասով, կապահովվեն սերտիֆիկատով բնակարան ստանալու համար»,-ասաց նա։ 

Նարեկ Ալեքսանյանի խոսքով ՝ պետք է հաշվի առնենք, որ Ադրբեջանն այս փուլում փորձելու է ցանկացած եղանակով շարունակել հոգեբանական ազդեցություն գործել, վիրավորել հայերի ազգային արժանապատվությունը։ 

Հիշեցնենք, որ MediaHub.am-ն Աղավոնոյում օգոստոսի 8 –ին զրուցել էր բնակիչների հետ, ովքեր ևս տարակուսանք էին հայտնել, որ իրենց տները վաճառվել են Ադրբեջանին, և այդ պատճառով է Տարածքային կառավարման և ենթակառուցվածքների նախարար Հայկ Խանումյանն ասում, որ տները չայրեն, չվնասեն, այլապես փոխհատուցում չեն ստանա։ 

Անի Գևորգյան