Վերջին օրերին Հայաստանում և Արցախում քննարկում են ԱԺ արտաքին հարցերի մշտական հանձնաժողովի նախագահի հայտարարությունը, որով ՀՀ իշխանությունը, փաստացի, վերջակետ դրեց շրջանառվող ու չբարձրաձայնվող կասկածներին՝ Հայաստանն այլևս Արցախի անվտանգության երաշխավորը չէ:
Իսկ դեռ վերջերս նույն իշխանության ներկայացուցիչները ոչ միայն պնդում էին հակառակը, այլև նշում, որ եթե զիջեցինք Արցախը, ապա զիջելու ենք Մեղրին ու հետո Երևանը։ Այս խոսքերի հեղինակը ԱԳ նախարար Արարատ Միրզոյանն է, որը նմանատիպ գրառում է արել երկու տարի առաջ՝ 2020 թվականի հոկտեմբերի 15-ին: Եվ, ի զարմանս մեզ, այս գրառումը չի ջնջել, ինչպես իր շատ կուսակից-գործընկերներ, որոնք հակառուսական գրառումներ էին անում (սքրինշոթերը կան), ապա շտապում Մոսկվա լայն ժպիտով ռուս պաշտոնյաների ձեռքերը սեղմելու:
Արարատ Միրզոյանի գրառումը ներկայացնում ենք ստորև, ապաև հարց ուղղում նրան՝ տեսակետը փոխե՞լ է.
«Էս պատերազմը նոր չի սկսվել։ Էս պատերազմը առնվազն մի քանի հարյուր տարի է վարում են մեր դեմ։
Նպատակը տարածք պոկելը չի, Վարանդան ու Բերձորը չեն, ոչ էլ Շուշին ու Ստեփանակերտը։ Նպատակը մեր ազգի ու պետության խեղճ ու անճար բուտաֆորիայի վերածումն է, քաղաքական քարտեզից մեր վերացումը, հնարավորության դեպքում՝ իսպառ բնաջնջումը։
Սարդարապատում, Նժդեհյան գոյամարտում, Արցախյան ազատամարտում մենք դա կանխել ենք։ Փոխել ենք բանաձևը։ Սա՛ չի ներվում մեզ։ Սա՛ են ուզում կոտրել։ Ու մեզ նորից Դեր-Զորի գլխիկոր լուռումունջը դարձնել։
Զիջեցինք Արցախը, զիջելու ենք Մեղրին ու հետո Երևանը։ Պիտի կանգնենք, այլ տարբերակ չկա։ Մի անգամ պիտի կանգնենք մինչև վերջ։
Խրիմյան Հայրիկը Բեռլինի կոնգրեսից որ հետ եկավ, երկաթե շերեփից բացի մի ուրիշ բան էլ ասեց։ Ասեց՝ սերբերի թրից արյուն էր կաթում, դրա համա՛ր իրենց երկիր տվեցին։
Արցախը մեր հայրենիքն է, մեր տունը։ Հայրենիքն ու տունը չեն զիջվում։ ՈՉ ՄԻ ԳՆՈՎ։
Կեցցե հավերժական հայ ժողովուրդը։
Հաղթելու ենք։ Անկասկած հաղթելու ենք»։
