ԱՄՆ վարչակազմը Հայաստանի և Ադրբեջանի ղեկավարությանը ներկայացրել է իր առաջարկները` վիճելի հարցերի լուծման վերաբերյալ: Այս մասին երեքշաբթի օրը հայտարարել է ԱՄՆ պետքարտուղարի Եվրոպայի և Եվրասիայի հարցերով օգնականի առաջին տեղակալ Դերեկ Հոգանը։
Նրա խոսքով՝ բանակցային գործընթացում առաջընթաց կա։
«Մայիսի սկզբին պետքարտուղարը հյուրընկալել էր երկու երկրների արտաքին գործերի նախարարներին՝ աշխատելու ամենավիճելի հարցերի շուրջ, օրինակ՝ զորքերի դուրսբերումը սահմանային գոտուց, ինչպես նաև Լեռնային Ղարաբաղում հաջողության հասնելու էթնիկ հայերի իրավունքների ու անվտանգության հարցում: Սրանք այն հարցերից են, որոնց վրա մենք աշխատում ենք»,- ասել է ԱՄՆ ԱԳՆ աշխատակիցը՝ ելույթ ունենալով Ներկայացուցիչների պալատի արտաքին հարաբերությունների հանձնաժողովի լսումների ժամանակ:
Պետդեպարտամենտի պաշտոնյան նշել է, որ մայիսի 1-ին Վաշինգտոնում ԱՄՆ պետքարտուղար Էնթոնի Բլինկենի միջնորդությամբ տեղի է ունեցել Ադրբեջանի և Հայաստանի արտգործնախարարներ Ջեյհուն Բայրամովի և Արարատ Միրզոյանի բանակցությունները։ Հոգանի խոսքով՝ այս հանդիպմանը եղել է «ինտենսիվ դիվանագիտական փոխգործակցություն»:
«Այժմ մենք ուսումնասիրում ենք, թե ինչ կարելի է անել ամենավիճելի հարցերում»,- հավելել է նա։
«Մենք մի շարք առաջարկներ ենք ներկայացրել, որոնք, հնարավոր է, երկու կողմերին էլ որոշակի հնարավորություն են տվել՝ տարաձայնությունները հաղթահարելու: Նրանք դրանք հաշվի են առել»,- ասել է Պետդեպարտամենտի պաշտոնյան։