ԵՄ երկրներն ԱՄՆ-ի մաքսատուրքերին պատասխան միջոցների շուրջ քվեարկություն կանցկացնեն

Եվրոպական միության անդամ երկրները պատրաստվում են ապրիլի 9-ին քվեարկել ԱՄՆ-ի կողմից պողպատի և ալյումինի համար սահմանված մաքսատուրքերի դեմ պատասխան միջոցների շուրջ, հաղորդել է «France24»-ը՝ վկայակոչելով ԵՄ բարձրաստիճան պաշտոնյայի։

Եվրոպական հանձնաժողովի առաջարկը կընդունվի, եթե դրան կողմ լինի որակյալ մեծամասնությունը՝ կազմված 15 անդամ երկրներից, որոնք ներկայացնում են ԵՄ բնակչության 65 տոկոսը:

Ֆրանսիայի նախագահ Էմանուել Մակրոնն ապրիլի 3-ին կհանդիպի այն ոլորտների ներկայացուցիչների հետ, որոնց վրա մաքսատուրքերի բարձրացումն ամենաշատը կազդի։ Բրիտանիայի առևտրի նախարար Ջոնաթան Ռեյնոլդսը հայտարարել է, որ ապրիլի 3-ին կհանդիպի տարբեր բիզնեսների հետ՝ հնարավոր պատասխան միջոցների մշակման համար։ Իսպանիայի վարչապետ Պեդրո Սանչեսը 14,1 միլիարդ եվրոյի ծրագիր կնախաձեռնի` մաքսատուրքերի ազդեցությունը նվազեցնելու համար։