Օգոստոսյան վաճառքից հետո լեհական բաժնետոմսերն այս տարի ամենավատ ցուցանիշն են գրանցել աշխարհում: Անկման պատճառների թվում Bloomberg-ը նշում է շուկայի խոցելիությունը Եվրոպայում էներգետիկ ճգնաժամի նկատմամբ։
Սպասվում է, որ օգոստոսի արդյունքներով՝ լեհական WIG 20 ֆոնդային ինդեքսը, որը ներառում է կապիտալիզացիայի 20 խոշորագույն ընկերությունները, կկորցնի 11 տոկոս։ Սա առավելագույն անկումն է 92 հիմնական համաշխարհային ցուցանիշների մեջ։ Ընդհանուր առմամբ, լեհական շուկան այժմ ցույց է տալիս վատագույն արդյունքները 2008 թվականի ճգնաժամից ի վեր։
Զեղչերով վաճառքին նպաստել է նաեւ երկրի խոշորագույն էլեկտրաէներգետիկ PGE ընկերության բաժնետոմսերի անկումը օգոստոսին, արժեթղթերը փլուզվել են գրեթե մեկ երրորդով: Լեհաստանում էլեկտրաէներգիայի արտադրության հիմնական վառելիքի` ածխի դեֆիցիտը եւ գների աճը կրճատում են շահույթը, քանի որ էլեկտրաէներգիայի արտադրությունը հիմնականում կապված է երկարաժամկետ պայմանագրերի հետ:
Ավելին, շուկայի վերականգնումը չի սկսվի այնքան ժամանակ, քանի դեռ պարզ չի դարձել, թե ինչպես է Եվրոպան այս ձմեռ անցնելու էներգետիկ ճգնաժամի միջով։ TFI Allianz Polska հիմնադրամի մենեջեր Ռաֆալ Յանչիկը նշել է, որ այս պարագայում որոշիչ դեր է խաղում Ռուսաստանից գազի մատակարարումների կրճատումը։ Փորձագետը հավելել է, որ ներդրողներին անհանգստացնում է նաեւ Ուկրաինային երկրի հարեւանությունը եւ պետական ընկերությունների աշխատանքին Վարշավայի միջամտությունը։