«Paramount Pictures» կազմակերպությունը երկու միջնորդություն է ներկայացրել Տեխասի դատարան՝ մերժելու ԱՄՆ նախագահ Դոնալդ Թրամփի 20 միլիարդ դոլար արժողությամբ հայցը։

Թրամփը դատական ​​հայց է ներկայացրել «Paramount»-ի դուստր «CBS News» լրատվամիջոցի դեմ 2024 թվականի հոկտեմբերին՝ ԱՄՆ նախագահի թեկնածու Քամալա Հարրիսի 60 րոպեանոց հարցազրույցի պատճառով: Ըստ ԱՄՆ նախագահի՝ ցանցը միտումնավոր խմբագրել է ծրագիրը՝ երկրի նախագահական ընտրություններից առաջ Հարրիսին դրական լույսի ներքո պատկերելու համար:

Թրամփը մեղադրել է «CBS News»-ին ընտրական գործընթացին միջամտելու մեջ «լուրի չարամիտ, խաբուսիկ և նյութական խեղաթյուրումների միջոցով, որոնք նախատեսված են շփոթեցնելու, խաբելու և մոլորեցնելու հանրությանը և փորձում են հավասարակշռությունը շեղել Դեմոկրատական ​​կուսակցության օգտին»։

Նախագահը սկզբում պահանջել էր 10 միլիարդ դոլարի վնասի փոխհատուցում, սակայն փետրվարին հայցը փոփոխության էր ենթարկվել՝ կրկնապատկելով գումարը:

«Դոնալդ Թրամփը, նրա գործընկեր-հայցվոր Ռոննի Ջեքսոնը և մեր կառավարության ամենաբարձր մակարդակի պաշտոնյաները ձգտում են պատժել լրատվական կազմակերպությանը սահմանադրորեն պաշտպանված խմբագրական դատողությունների համար, որոնք իրենց դուր չեն գալիս», - նշել է Paramount-ն իր միջնորդություններից մեկում։ Ըստ կազմակերպության՝ ցանցի իրավունքները պաշտպանված են երկրի Սահմանադրության Առաջին փոփոխությամբ։

Մեկ այլ միջնորդության մեջ ընկերությունը պնդել է, որ ի թիվս այլ բաների՝ Թրամփը չի կարող պնդել, որ իր անձնական առևտրային շահերը վնասվել են «CBS News» ծրագրի լսարանին մոլորեցնելով: