Չնայած իրավապահ մարմինների պարբերաբար զգուշացումներին ու հայտարարություններին, ՀՀ քաղաքացիների նկատմամբ օտարերկրացիների կողմից հեռախոսային արշավը՝ խարդախության տեսքով շարունակվում է։ 

«Սա գումար շորթելու նոր ձև է»,- ասում է MediaHub-ի զրուցակից երևանաբնակ Հելենա Մելքոնյանը։ Հերթական զանգը ստացել է իր հարևանի ընտանիքը։

«Երկու օր առաջ մեր տարեց հարևաններ՝ Բորյայի և Իրայի քաղաքային հեռախոսահամարին են զանգել, որին պատասխանել է ձյաձ Բորյան։ Իրենք երկուսով են ապրում՝ ծեր, թոշակառու մարդիկ են, մի դուստր ունեն Մոսկվայում է ապրում։  Երբ Բորյան վերցրել է հեռախոսը, մի աղջիկ սկսել է բղավել հեռախոսի մեջ, թե՝ «իմ պատճառով մարդ մահացավ, ես եմ մեղավոր, ամեն ինչ վատ ա, կյանքս ավարտվեց» ու շարունակ բղավում էր»,- պատմում է նա։ 

Հելենայի խոսքով՝ տարեց տղամարդը վախեցել է, սիրտը վատացել, որից հետո խոսակցությունը շարունակել է կինը։

«Իրայի հետ ինչ որ մի տղամարդ է շարունակել խոսակցությունը, ներկայանալով, թե իբր իրավաբան է։ Նա հարևանուհուս ասել է՝ «ձեր աղջկա գործը ոստիկանությունում փակելու և նրան ազատ արձակելու համար անհրաժեշտ է 15 հազար դոլար»։ Իրան ասել է՝ «թոշակառու կին եմ, ինձ որտեղի՞ց էդքան գումար», այդ ենթադրյալ իրավաբանն ասել է՝ «ունեցվածքդ վաճառիր, գումարն ուղարկիր»»,- պատմում է Հելենան։ 

Կինը կասկածելով, որ ինչ որ բան այն չէ, զուգահեռ բջջային հեռախոսով զանգել է մոսկվաբնակ դստերն ու պարզել, որ նրա մոտ ամեն ինչ կարգին է և որ նա որևէ կապ չունի այդ «ահազանգի» հետ։ 

«Հասկանո՞ւմ եք խարդախություն է, որից շատ հավանական է, որ մարդիկ կարող են ինֆարկտ ստանան: Էս ի՞նչ խայտառակություն է»,- հավելեց մեր զրուցակիցը։

Նշենք, որ վերջին օրերին բազմաթիվ երևանցիներ նմանատիպ հեռախոսազանգեր են ստանում՝ քաղաքային հեռախոսահամարներին: Խարդախները ներկայանում են իրավաբան, ոստիկան, բժիշկ և այլն, իսկ սխեման նույնն է՝ ձեր ազգակիցը՝ որդին, դուստրը, ամուսինը, եղբայրը և այլն, հայտնվել են ինչ-որ վատ իրավիճակում, որը շտապ լուծում է պահանջում դրամական խոշոր փոխանցման դիմաց: Խարդախները խաղում են մարդկանց էմոցիաների վրա՝ բղավում, լացում, գոռում, ավելորդ աղմուկ անում, որն էլ, ինչպես նշում են հոգեբանները, մարդկանց մոտ տագնապ են առաջացնում և մարդիկ պահի տակ կորցնում են ռացիոնալ մտածելու ունակությունը: Հետևապես, պետք է զգոն լիներ, իրավապահները հորդորում են զսպել էմոցիաները, անգամ ամենավատ լուրը լսելիս չխառնվել իրար, փորձել զուգահեռաբար ճշտել ստացած տեղեկության իսկությունը: 

Հունան Թադևոսյան