Ակտիվ հրետակոծության ինտենսիվությունը որոշակիորեն նվազել է Հայաստանի բանակի ադեկվատ պատասխան գործողություններից հետո։ Այդ մասին Կառավարության նիստի մեկնարկին ասաց Նիկոլ Փաշինյանը՝ անդրադառնալով Սոթքի ուղղությամբ թշնամու սանձազերծած հրետակոծությանը։
Նրա խոսքով՝ հայկական կողմն ունի չորս վիրավոր։
«Ադրբեջանական կողմի գործողությունները սադրիչ են, և նպատակ ունեն զրոյացնել այն առաջընթացը, որ գրանցվել է մայիսի 1-4-ը Վաշինգտոնում տեղի ունեցած բանակցությունների ընթացքում։ Այսօրվա սադրանքը նպատակ ունի նաև խաթարել կիրակի օրը Բրյուսելում եռակողմ ֆորմատով, իսկ հունիսի 1-ին Քիշնևում սպասվող հնգակողմ բանակցությունները։ Փորձը ցույց է տալիս, որ Ադրբեջանին բանակցային գործընթացը հարկավոր է միայն էսկալացիայի պատճառաբանություն ստանալու համար։ Իսկ էսկալացիաներ լինում են բացառապես բանակցություններում գրանցված որևէ առաջընթաց զրոյացնելու համար։ Սա է տեղի ունենում հիմա»,- նշեց նա։
Նիկոլ Փաշինյանը նկատեց՝ Ադրբեջանի ՊՆ երեկվա հաղորդագրությունները՝ մեր ԶՈՒ կողմից հրադադարը խախտելու մասին, մտացածին են։ Նման տեղեկատվություն հորինվում է իրադրությունը սրելու համար։
«Եթե Ադրբեջանի նպատակը իրադրությունը սրելը չէ, ապա որևէ տեղային միջադեպ կարելի է արագ կարգավորել։ Նախորդ օրը որևէ միջադեպ չի գրանցվել, և ադրբեջանական դեզինֆորմացիոն մեքենան ետին թվով այդ լուրը հորինել է իրադրությունը սրելու համար»,- ասաց նա։
Ըստ Փաշինյանի՝Ադրբեջանի նպատակներից է նաև Լաչինի միջանցքում ադրբեջանական անցակետ տեղակայելուց միջազգային հանրության ուշադրությունը շեղելը, որն արվում է նոր տեղում նոր ճգնաժամ ստեղծելու միջոցով։
«Սա Ադրբեջանի փորձված մարտավարությունն է։ Սեպտեմբերյան ագրեսիան մոռացության մատնելու փորձ արեցին՝ կեղծ բնապահպանական ակտիվիստներով Լաչինի միջանցքը արգելափակելու միջոցով։ ԼՂ-ում ստեղծված հումանիտար ճգնաժամը մոռացության տալու համար Տեղ գյուղ մտան։ Ի հեճուկս Ադրբեջանի ջանքերի, այս բոլոր հարցերը, բնականաբար, շարունակում են մնալ մեր առաջնային օրակարգում»,- վստահեցրեց Նիկոլ Փաշինյանը։
Նա տեղեկացրեց, որ այս պահի դրությամբ Բրյուսել մեկնելու որոշումը դեռևս չի փոխել։
«Նաև ուզում եմ պատասխանել մի հարցի, որ կարող է հնչի։ Որքանո՞վ է հավանական, որ կիրակի օրը Ադրբեջանի հետ խաղաղության պայմանագիր կստորագրվի։ Ցավոք, այդ հավանականությունը շատ փոքր է»,- նշեց Նիկոլ Փաշինյանը։
Մանրամասները՝ տեսանյութում։