Ամերիկացի պրոֆեսորը դատական հայց է ներկայացրել Նյու Ջերսիի համալսարանի դեմ՝ ուսումնական հաստատության անփութության պատճառով, որի արդյունքում 380 միլիոն տարվա բրածոները հայտնվել են աղբավայրում: Այս մասին հաղորդել է «NBC News»-ը։
Անցյալ շաբաթ Պասաիկ շրջանի Գերագույն դատարանում ներկայացված քաղաքացիական հայցի համաձայն՝ Վիլյամ Պատերսոնի համալսարանի բնապահպանական գիտությունների պրոֆեսոր և պալեոնտոլոգ Մարտին Բեքերը նախատեսում էր համագործակցել գործընկերոջ հետ Դեւոնյան ծովային անողնաշարավորների բրածոների իր հավաքածուի մասին մենագրության վրա:
Հունիսի 18-ին Բեքերը մոտ 200 բրածոներ փաթեթավորել է 19 առանձին արկղերի մեջ, որպեսզի հավաքածուն ուղարկի Ֆլորիդայի գործընկերոջը: Նույն օրը դրանք հանձնվել են համալսարանի փոստային բաժանմունք և հանձնվել են փոստատար Ռայմոնդ Բունին։
Առաքող UPS ընկերությունը վերցրել է փաթեթները, սակայն մի քանի օր անց պրոֆեսորի գործընկերները նրան հայտնել են, որ բրածոները երբեք չեն առաքվել:
Սեպտեմբերի 20-ին Բունն ասել է Բեքերին, որ փաթեթները կարող են լինել UPS-ի խարդախության բաժնում: Գիտնականը կապվել է փոխադրող ընկերության հետ, որտեղ նրան հայտնել են, որ Ուիլյամ Պատերսոնի համալսարանը չի վճարել անհրաժեշտ հաշիվները։ Սրա հետևանքով համալսարանի պատվերը չեղարկվել է։
«Մեր հաճախորդը իմացել է, որ փաթեթները նետվել են անհայտ աղբավայրում, Թենեսի նահանգի Նեշվիլում կամ մոտակայքում», - ասվում է հայցում:
Բեքերը պահանջել է փոխհատուցում հավաքածուի հետ կապված վնասների համար, նաև բժշկական ծախսեր հոգեկան անհանգստության համար: