Ե՞րբ կհրապարակվեն եռօրյա պատերազմում զոհվածների անունները

Հայ-ադրբեջանական եռօրյա պատերազմից անցել է 40 օր, սակայն դեռևս հստակեցված չէ՝ քանի զոհ ու անհետ կորած ունենք․ անունների ցանկ ևս չի հրապարակվել։ 

MediaHub.am-ը ՊՆ-ից հետաքրքրվեց՝ ե՞րբ զոհվածների անունները կհրապարակվեն։ «Ինչպես հայտնեց վարչապետը, անվանացուցակը կհրապարակվի ինստիտուցիոնալ մեխանիզմով՝ զինծառայողների ապահովագրության հիմնադրամում»,- մեզ հետ զրույցում ասաց ՊՆ մամուլի քարտուղար Արամ Թորոսյանը։ 
Նրա խոսքով՝ անհրաժեշտ տեղեկատվության փոխանցման գործընթացը՝ նախարարությունից հիմնադրամ, ընթացքի մեջ է։ 

Ինչ վերաբերում է զոհերի մարմիննեի դուրսբերմանը, ապա Արամ Թորոսյանը նշեց, որ ՀՀ կառավարությունը, պաշտպանության նախարարությունը, միջնորդների և միջազգային գործընկերների ներգրավմամբ ամենօրյա աշխատանքներ են իրականացնում այդ ուղղությամբ: 

Հիշեցնենք, Աստանայում ելույթի ժամանակ Նիկոլ Փաշինյանը հայտարարեց, որ Ադրբեջանի նախագահի հետ պայմանավորվածություն է ձեռք բերվել՝ մարմինները դուրս բերելու ուղղությամբ։ Դրանից օրեր անց ՀՀ ՄԻՊ Քրիստիննե Գրիգորյանը հայտարարեց, որ Ադրբեջանը խոչընդոտում է մարմինները դուրս բերելու գործընթացը։ 

Նշենք նաև, որ ոչ պաշտոնապես զոհվածների ցուցակը հրապարակվել է՝ լրագրողի ու ոչ անտարբեր մարդկանց ջանքերով:

Նարե Գնունի