Արարատի մարզի Երասխ վարչական շրջանի ընդամենը 9 ամսվա ղեկավար Սարո Այվազյանի լիազորությունները դադարեցվել են:
NEWS.am-ի հետ զրույցում Արարատ համայնքի ղեկավար Ասլան Ավետիսյանը պնդում է՝ լիազորությունները դադարեցնելու պատճառը աշխատանքում թերություններն են, իսկ թե ինչ թերություններ, համայնքապետը չի նշում, միայն առաջարկում է երկուշաբթի համայնքապետարան այցելել, որպեսզի աշխատակազմի ղեկավարը մանրամասներ հայտնի:
«Խնդիր իր աշխատանքային գործունեությունն է, աշխատանքում թերությունները, մնացած մանրամասները կհայտնի աշխատակազմի ղեկավարը»,- ասաց նա:
Երասխի համայնքապետարանում մեր աղբյուրը հայտնում է, որ լիազորությունները ժամանակից շուտ դադարեցնելու պատճառը այն է, որ Սարո Այվազյանը ինքնուրույն էր գործում, չէր ենթարկվում Արարատի համայնքապետի ամեն մի խոսքին:
«Սարո Այվազյանը անկուսակցական է, պատերազմների մասնակից, 44-օրյայում էլ վիրավորվել է, գյուղում նրան ընդունում եւ հարգում են: Պաշտոնանկությունը մի քանի նկատողությունների հիման վրա է եղել, իբր աշխատանքում թերություններ են եղել: Նրանց ձեռք չէր տալիս ինքնուրույն համայնքապետ, նրանց ամեն մի խոսքին չենթարկվող մարդ»: Իրենք ուզում են, որ ոնց ասեն, այնպես լինի, այսինքն իրենց հարկ հավաքող է պետք, ոչ թե համայնքապետ: Արարատի համայնքապետի համար պետք է լինել խոնարհ ծառա, որ բան չասեն, ինքը ոնց եղել է սրիկա, այդպես էլ մնացել է»,- նշեց մեր աղբյուրը:
Այս պահին ժամանակավոր պաշտոնակատար է նշանակվել համայնքապետարանի աշխատակիցներից մեկը, որը Արմաշ համայնքից է:
Մեր տեղեկություններով Սարո Այվազյանը բողոքարկելու է այս որոշումը՝ ընդհուպ դատական կարգով:
Հիշեցնենք, որ Ասլան Ավետիսյանի անունը կապված է Արարատում տարիներ առաջ ծառից կախված հայտնաբերված Գյանջիրով Հովհանյանի դեպքի հետ: Մահացածի հարազատները պնդում են, որ կատարվածը սպանություն է, այլ ոչ թե ինքնասպանություն եւ դրա հետեւում կանգնած են Ասլան Ավետիսյանի որդիները:
Նշենք, որ տարիներ առաջ ընդդիմադիր պատգամավոր Նիկոլ Փաշինյանը այս դեպքով Ազգային ժողովում ելույթ էր ունենում՝ իշխանություններին մեղադրելով, թե ինչու չի բացահայտվում դեպքը, իսկ տարիներ անց՝ հեղափոխությունից հետո պաշտոնի է նշանակում Ասլան Ավետիսյանին: