Մեզ պարտադրում են ավելի եկամուտ ունենալ, որպեսզի հարկերը շատ լինեն։ Այս մասին այսօր ավտոներկրողների բողոքի ակցիայի ժամանակ ասաց «Ամերիքան գլոբալ գրուփ» ընկերության տնօրեն Վարդան Օնանյանը։

Հիշենցենք, որ այսօր Կառավարության նիստին զուգահեռ ավտոներկրողները բողոքի ակցիա են սկսել։ Օնանյանը նշեց, որ Կառավարության դիմաց հավաքված են գործարարներ, որոնք զբաղվում են նաև ավտոմեքենաների ներկրմամբ, մասնավորապես ԱՄՆ-ից՝ աճուրդներից մեքենաներ գնելով ու ՀՀ տեղափոխելով:

«Ինձ համար շատ զարմանալի է փորձագիտական եզրակացությունը, հիմնավորումներ են բերված, որոնք բացարձակ իրականությանը չեն համապատասխանում։ Կարծիքներ եմ լսում, որ ավտոներկրողները թանկով են բերում, էժան ցույց տալիս, որպեսզի եկամուտներ թաքցնեն։ Բացառում եմ նման երևույթները»,-ասաց նա։

Օնանյանի խոսքով՝ եթե կան մարդիկ, որ խախտումներով են աշխատում, ապա պետք է իրենց ուղղությամբ գործընթացներ սկսել և ոչ թե «բաց ճակատով աշխատողներին» ճնշել։

«Ֆորսմաժորային իրավիճակ է։ Հայտնի է, որ դրսից ներկրված ավտոմեքենաների արժեքներն ավելի ձեռնտու են, քան այստեղի շուկայական գները։ Բազմաթիվ են մեր հայրենակիցները, ովքեր ցանկանում են 3 ամիս սպասել, բայց ունենալ ավելի լավ ու էժան մեքենա․ ի՞նչն է խնդիրը։ Մեր նման ընկերությունները նախնական պայմանագիր են կնքում հաճախորդների հետ, փաստացի արձանագրվում է նաև վաճառքի գինը։ Ամեն մի մեքենայի մեջ ունենում ենք շատ փոքր եկամուտ: Նախորդ շաբաթ ԱԺ-ն երկրորդ ընթերցմամբ ընդունեց օրենք՝ «Հարկային օրենսգրքում փոփոխություններ և լրացումներ կատարելու մասին», որով պարտադրվում է մեր նման ընկերություններին՝ ունենալ նվազագույնը 20 տոկոս եկամուտ, և բնականաբար, հարկերը տալ այդ 20 տոկոսից: Հավատացնում եմ՝ երբևէ չի եղել, որ տնտեսվարողը մեկ մեքենայի գործարքից ունենա 20 տոկոս եկամուտ։ Այս նախագծով մեքենաները կթանկանան, իսկ ավտոպարկը կծերանա»,-նշեց Օնանյանը։

Մանրամասները՝ տեսանյութում