«Հայտնաբերվել է օձ»․ ամռան ամիսներին ԱԻՆ պաշտոնական լրահոսում գերակշիռ մաս են կազմում նման վերտառությամբ հայտարարությունները։

ԱԻՆ լրատվական բաժնից MediaHub.am-ի հետ զրույցում հայտնեցին, որ 2022 թվականի հունիսի 1-ից հուլիսի 25-ն ընկած ժամանակահատվածում ԱԻՆ ահազանգերի թիվը հասել է 680-ի, հայտնաբերվել է 338 օձ, որից 85-ը՝ թունավոր։

Ահազանգերից 222-ը եղել է Երևանում, այստեղ հայտնաբերվել է 115 օձ, որից 24-ը՝ թունավոր։ Երկրորդ տեղում Կոտայքի մարզն է․ ահազանգերի թիվն այնտեղ 139 է․ հայտնաբերվել է 70 օձ, որից 11-ը՝ թունավոր։ Երրորդ տեղում Արարատի մարզն է, այնտեղ էլ եղել է 62 ահազանգ, հայտնաբերվել է 25 օձ, 5-ը՝ թունավոր։

Առողջապահության նախարարությունից MediaHub.am-ին հայտնեցին, որ 2022 թվականի մինչև հուլիսի 19-ը օձի խայթոցից հետո բուժհաստատություն է դիմել 39 քաղաքացի։

Ի՞նչ անել՝ օձ տեսնելիս կամ ինչպե՞ս վարվել, եթե արդեն սողունը խայթել է․ հարցերի շուրջ MediaHub.am-ը զրուցել է ԱԻՆ փրկարարական աշխատանքների իրականացման կենտրոնի փրկարարական ջոկատի հրամանատար Կարեն Ավետիսյանի հետ։

Նրա խոսքով՝ օձ տեսնելիս պետք է փորձել սողունին տեսադաշտում պահել, բայց չմոտենալ նրան։ Ապա պետք է զանգել 911 և հետևել օպերատորի խորհուրդներին։

«Իսկ եթե արդեն կա խայթոց, չպետք է կտրուկ գործողություններ անել, չվազել։ Այդ ժամանակ պետք է շատ հեղուկ օգտագործել։ Չի կարելի կտրել, խայթած տեղում կտրվածքներ անել, վերքից արյունը տարածել, բերանով արյունը քաշել։ Եթե ոչ թունավոր օձ է խայթել, ապա կարելի է յոդով կամ կալիումի պերմանգանատի լուծույթով մշակել վերքը»,- նշեց նա։

Հարցին, թե ինչպե՞ս կարող է մարդը տարբերել թունավոր օձի խայթոցը ոչ թունավոր օձի խայթոցից, Կարեն Ավետիսյանը պատասխանեց՝ նշելով, որ թունավոր օձի խայթոցի դեպքում մաշկի վրա վերևի երկու ատամների հետքն է լինում և այդ հատվածն արյունահոսում է, իսկ ստորին ատամների տեղը շատ թույլ է երևում։

Հարցին, թե ինչպե՞ս կարող է մարդը տարբերել թունավոր օձի խայթոցը ոչ թունավոր օձի խայթոցից, Կարեն Ավետիսյանը պատասխանեց՝ նշելով, որ թունավոր օձի խայթոցի դեպքում մաշկի վրա վերևի երկու ատամների հետքն է լինում և այդ հատվածն արյունահոսում է, իսկ ստորին ատամների տեղը շատ թույլ է երևում։

«Ոչ թունավոր օձի խայթոցի դեպքում մարդու մաշկի վրա երևում է օձի ամբողջ ատամնաշարը»,- ներկայացրեց մասնագետը։

Կարեն Ավետիսյանի խոսքով՝ այսպես թե այնպես, օձի խայթոցից հետո պետք է անպայման դիմել բուժհաստատություն։

Նարե Գևորգյան