Վերջին ԱԺ նիստերի օրերին ընդդիմադիր պատգամավորներին լրագրողները խորհրդարանի միջանցքներում հաճախ են տեսնում։ Նիստերին չեն մասնակցում, քննարկումներին չեն միանում, անգամ Կառավարության հետ հարցուպատասխանին ներկա չէին, թեև գիտեին, որ հաջորդ օրը Փաշինյանը մեկնում է Էրդողանի հետ հանդիպման, բայց պարբերաբար ճեպազրույցների են մասնակցում։
MediaHub.am-ի տեղեկություններով՝ սա խորհրդարանական ընդդիմության նոր «գործելաոճն է», որպեսզի մանդատներից չզրկվեն։ Ըստ մեր աղբյուրների՝ ընդդիմադիրները գրաֆիկ են կազմել, որով էլ որոշվում է, թե որ օրը ով ԱԺ կայցելի։ Իբրև թե խնդիր է դրված, որպեսզի ընդդիմադիրներին հնարավոր չլինի նիստերից բացակայելու հիմքով մանդատից զրկել: Թեև մանդատից զրկել հնարավոր է այն դեպքում, երբ պատգամավորը չմասնակցի քվեարկություններից կեսից ավելիին:
Տեղեկությունը ճշտելու համար փորձեցինք կապ հաստատել «Հայաստան» խմբակցության պատգամավոր Իշխան Սաղաթելյանի հետ, որը, սակայն, մեր զանգերին չպատասխանեց։ Զանգերին չպատասխանեց նաև Էլինար Վարդանյանը, «Պատիվ ունեմ» խմբակցության պատգամավորներ Հայկ Մամիջանյանն ու Տարոն Մարգարյանը և այլք: Իրականում ընդդիմությունը, ըստ ամենայնի, գրաֆիկ է կազմել զանգերին չպատասխանելու համար:
Հատկանշական է, որ իրենց օրակարգով ԱԺ չվերադարձող ընդդիմադիր պատգամավորները, կարծես, չեն հրաժարվում գործուղումների մեկնելուց: Օրինակ, Միջխորհրդարանական միության 145-րդ վեհաժողովին մասնակցելուց։ Ազգային ժողովի նախագահ Ալեն Սիմոնյանի կարգարդությամբ՝ ԱԺ պատգամավորները հոկտեմբերի 9-15-ին կմեկնեն Ռուանդա, պատվիրակության կազմում է նաև «Հայաստան» խմբակցության պատգամավոր Էլինար Վարդանյանը։ Գործուղման հետ բոլոր ծախսերը, այդ թվում՝ ճանապարհածախսը, օրապահիկը, գիշերավարձը հոգում է ՀՀ պետբյուջեն: Իսկ Տարոն Մարգարյանի անունը նշված է ՌԴ ԱԺ նախագահի կատարվելիք այցի պատվիրակության կազմում:
Սակայն, ինչպես արդեն նշեցինք, որևէ մեկը հեռախոսազանգերին այդպես էլ չպատասխանեց, որպեսզի հասկանանք՝ լավ, ԱԺ նիստերին չեն մասնակցում, գործուղումներից է՞լ են հրաժարվում:
Լիաննա Թորոսյան