Պակիստանի մեծ մասում մուսոնային հորդառատ անձրեւների հետեւանքով առաջացած ջրհեղեղները հունիսի կեսերից մոտ 1000 մարդու կյանք են խլել, հազարավոր մարդիկ վիրավորվել եւ տեղահանվել են, հայտնում է AP-ն՝ վկայակոչելով պաշտոնյաներին:
Զոհերի նոր թվի մասին տեղեկատվությունը հայտնվեց մեկ օր անց այն բանցի հետո, երբ վարչապետ Շահբազ Շարիֆը միջազգային օգնություն խնդրեց՝ աղքատ իսլամական երկրում մահացու ջրհեղեղների դեմ պայքարելու համար:
Մուսոնային սեզոնը, որը սկսվել է հունիսին, այս տարի ուժգին հորդառատ անձրեւներով հարվածեց Պակիստանին, եւ փրկարարները դժվարությամբ են տարհանում հազարավոր մարդկանց ջրհեղեղից տուժած շրջաններից: Ճգնաժամը ստիպել է կառավարությանը արտակարգ դրություն հայտարարել։
Հյուսիսարեւմտյան Խայբեր-Փախտունխվա նահանգում ջրհեղեղն ավերել է Սվաթ գետի ջրի վերահսկման խոշոր համակարգի դարպասները, ինչը ջրհեղեղի է հանգեցրել Չարսադդա եւ Նուշերա շրջաններում:
Տեղեկատվության նախարար Մարիամ Աուրանգզեբն ասել է, որ զինվորներն ու փրկարար կազմակերպություններն օգնում են մարդկանց ապահով վայրեր հասնել հարավային Սինդ, հյուսիս-արեւմտյան Խայբեր-Փախտունխվա, արեւելյան Փենջաբ եւ հարավ-արեւմտյան Բելուջիստան նահանգներում։