Ինչպես ավելի վաղ MediaHub-ը տեղեկացրել էր, Ստեփանակերտի Վերածննդի հրապարակում մի քանի ժամ ընթացող հանրահավաքից հետո իրավիճակը լարվել է:

Քիչ առաջ հանրահավաքի մասնակիցները փակեցին նախագահի նստավայրի մուտքը՝ պահանջելով, որպեսզի Արայիկ Հարությունյանն անձամբ իջնի ու պատասխանի նրանց հուզող հարցերին, թե ինչ է լինելու Արցախի հետ: Հատկապես, երբ Հայաստանի իշխանությունները բաց տեքստով հայտարարեցին, որ ՀՀ-ն այլևս չի ապահովելու Արցախի անվտանգությունը:

Հանրահավաքի մասնակիցները հայտարարել էին՝ 30 րոպե են տալիս Հարությունյանին, դրանից հետո կդիմեն գործողությունների:

MediaHub-ը փորձեց Արայիկ Հարությունյանի խոսնակ Լուսինե Ավանեսյանից ճշտել՝ ի՞նչ է պատրաստվում վերջինս անել, հնարավո՞ր է իջնի քաղաքացիների մոտ: Սակայն խոսնակը հստակ որևէ պատասխան չտվեց.
«Զարգացումների մասին տեղյակ կպահենք»,- եղավ Ավանեսյանի պատասխանը:

Մինչդեռ, քաղաքացիների տված կես ժամն արդեն անցել է, իրավիճակը շարունակում է լարված մնալ: Սպասենք զարգացումների:

Լիաննա Թորոսյան