Այսօր՝ փետրվարի 16-ին, խոշոր ավտովթար է տեղի ունեցել Գեղարքունիքի մարզում։ Ժամը 21։10-ի սահմաններում Գեղարքունիքի մարզի բնակիչ, 41-ամյա Գ․ Մարտիրոսյանը իր վարած Mercedes մակնիշի ավտոմեքենայով Ծովագյուղի կենտրոնական փողոցում դեռևս անհայտ հանգամանքներում բախվել է կայանված վիճակում գտնվող Lexus և Mercedes մակնիշի ավտոմեքենաներին։

Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով մեկ հոգի մարմնական վնասվածքներով տեղափոխվել է «Սևան» բժշկական կենտրոն։ Վիրավորին առաջինը օգնության են հասել քաղաքացիները և այդ պահին նշված գյուղում ծառայություն կատարող պարեկները ու օպերատիվորեն ժամանած Սևանի հիվանդանոցի բժիշկների հերթապահ խումբը։ 

Բախման հետևանքով  Գ․ Մարտիրոսյանի Mercedes-ը գլխիվայր շրջվել է։

Վթարի փաստով Սևանի Քննչական բաժնում նախաձեռնվել է վարույթ։

Ոստիկանությունն ու Քննչական բաժինը պարզում են կայանված վիճակում վթարված ավտոմեքենաների սեփականատերերի ինքնությունը։

Դեպքի վայր էր ժամանել նաև Գեղարքունիքի մարզի Դատախազության ավագ դատախազ Արթուր Գևորգյանը։