Փաշինյանն՝ ամեն անգամ հրապարակային ելույթներ ունենալիս, Հռոմի պապից ավելի կաթոլիկ թվալու, կամ, որ ավելի հասցեական, հայրենասեր երեւալու համար խոսքը համեմում է՝ ազգային հերոսներին մեջբերելով։
Վազգեն Սարգսյանի համար ավելի նվաստացուցիչ բան չէր կարող լինել այն, ինչ այսօր արեց Փաշինյանը՝ անդրադառնալով իր իշխանության վախերին։ Լրագրողի հարցին, թե արդյո՞ք վախվորած կամ խաղաղություն մուրալու քաղաքականություն չի վարում իր իշխանությունը, երբ ասում է, որ ՀԱՊԿ զորավարժությունները սպառնալիք կլինեն թուրք-ադրբեջանական տանդեմի համար, հետեւաբար Հայաստանում ՀԱՊԿ խաղաղապահ զորավարժություն անցկացնելն այս իրավիճակում նպատակահարմար չէ, Փաշինյանն արձագանքեց՝ մեջբերելով Վազգեն Սարգսյանի հայտնի խոսքերը․ «Ես վախենում եմ ոչնչից չվախեցողներից».
«Վազգեն Սարգսյանն էր, չէ, ասում՝ ես վախենում եմ ոչնչից չվախեցողներից։ Մենք պետք է պատասխանատու գործենք մաքսիմալ։ Կան սպառնալիքներ, որի հետ պիտի հարաբերվենք»,-ասաց նա։
Վազգեն Սարգսյանի հանճարեղ մտքերից լավ կանեիր անգիր արած երգի նման հիշեիր․ «Երկրի մայրաքաղաքը սկսվում է խրամատից» ձեւակերպումը ու դադարեցնեիր բանակի հեղինակազրկումը։ Չկա ավելի մեծագույն դավաճանություն, երբ թշնամական մամուլի գլխագրերում ՀՀ վարչապետի՝ բանակի մասին արված խայտառակ հայտարաություններն են․ «Կարծում էինք, թե ուժեղ բանակ ունենք», «Եթե Հայաստանը կարողանար իր անվտանգությունն ապահովել, չէին ասի, որ ՌԴ-ն է ՀՀ-ի անվտանգության երաշխավորը» եւ այլն։ Վազգեն Սարգսյանը չէր վախենում թուրք-ադրբեջանական տանդեմից, ինչպես դո՛ւ։ Սպարապետը վախենում էր կորցնել իր հայրենիքը, վախենում էր արժեզրկված տեսնել Արցախյան ազատագրական պայքարը, Հայաստանի Հանրապետության զինված ուժերը։ Վազգեն Սարգսյանը պայքարում էր հենք քո՛ նմանների դեմ ու իր աֆորիզմ դարձած մտքերը, որ այսօր առավել, քան ակտուալ են, ունեն մեկ հասցեատեր՝ Նիկոլ Փաշինյանը:
Դու եւ քեզ հետ՝ Հայաստանն ու Արցախը թուրք-ադրբեջանական տանդեմին հանձնող ՔՊ-ականները 2018թ․-ից ոչնչացնում ու ստվերում եք Սպարապետի թողած արժեքները՝ գրաքննելով ու խմբագրելով ազգային հերոսների կյանքն ու նվիրումը առ հայրենիք։ Քեզ երբեւէ մտահոգե՞լ է այն, թե ի՞նչ կասեր Վազգեն Սարգսյանը, երբ լսեր ՔՊ-ական Սասուն Միքայելյանի, որը համատեղությամբ նաեւ Սպարապետի ստեղծած ԵԿՄ-ի ղեկավարն է, հայտարությունը, թե «Հայաստանում թավշյա հեղափոխության հաղթանակն ավելի կարեւոր է, քան Արցախյան ազատագրական պատերազմը»։
Բայց եկեք չմոռանանք, որ Նիկոլի ամեն մի խոսքը խորը մանիպուլյատիվ էֆեկտ ունենալու նպատակներ է հետապնդում և Վազգեն Սարգսյանի կամ մեկ այլ հայորդու անունը տալը, ով իր կյանքը նվիրել է անկախ Հայաստան ու Արցախ ունենալու գաղափարին, ընդամենը փորձ է իր վրայից դավաճանի պիտակը մաքրելու ու նրանց հետ մեկ հարթության մեջ ներկայանալու....
Լիա Սարգսյան