«Փաստ» օրաթերթը գրում է.
Երեկ Նիկոլ Փաշինյանը հերթական «արարն» է երկնել Հայ առաքելական եկեղեցու դեմ հայտարարած պատերազմի: «Գարեգին Բ–ն խախտել է իր իսկ կողմից կամավորությամբ ստանձնած կուսակրոնության ուխտը և զավակ ունի։ Սա փաստ է և եթե Գարեգին Բ–ն փորձի հերքել, անհրաժեշտ ձևաչափով դա կապացուցեմ։ Ըստ այսմ, համաձայն Հայ առաքելական եկեղեցու Կանոնագրքի, Գարեգին Բ-ն չէր կարող լինել եպիսկոպոս, արքեպիսկոպոս, չէր կարող ընտրվել եւ չի կարող լինել Կաթողիկոս. Կտրիճ Ներսիսյանը պետք է ազատի Վեհարանը... Հայաստանյայց առաքելական սուրբ եկեղեցու հավատավոր հետևորդներին կոչ եմ անում համախմբվել Վեհարանը սիրով եւ քրիստոնեաբար ազատելու եւ որևէ իրապես սրբազան հոգևորականի Ամենայն Հայոց Կաթողիկոս ընտրելու օրակարգի շուրջ»,գրել է նա:
Վերջին շրջանում Եկեղեցու դեմ իշխանությունների արշավին է անդրադարձել նաև «Հանրապետության հրապարակ» տելեգրամյան ալիքը՝ նշելով. «Փաշինյանն ու քպական կապիտուլ յանտ խմբակն անցել են բացահայտ հարձակման Հայ առաքելական եկեղեցու դեմ՝ ամենակեղտոտ բառապաշարով քննադատելով Եկեղեցին, Կաթողիկոսին և սրբազաններին։ Փաշինյանական կլանը համահունչ է գործում թուրք-ադրբեջանական տանդեմին։ Թուրքիան և Ադրբեջանը նույնպես Հայ առաքելական եկեղեցուն են թիրախավորում, ինչպես և նրանց երևանյան արտակարգ և լիազոր դեսպանները՝ ՔՊ-ն ու հեծանիվի սիրահար, Թուրքիային ու Ադրբեջանին Կուրբան Բայրամի կապակացությամբ շնորհավորող պարագլուխը։ ՀՀ քաղաքացիներին արդեն ակնհայտ է, որ ՔՊ-ն ու նրանց պարագլուխը ցանկանում են կազմաքանդել Հայ առաքելական եկեղեցին՝ դրանով սպասարկելով Բաքվի ու Անկարայի, ինչպես նաև աղանդավորականների շահերը Փաշինյանն ու թիմն անցել են կոռեկտության բոլոր սահմանները. նրանք սև փիառ են իրականացնում Հայ առաքելական եկեղեցու դեմ՝ օգտագործելով իրենց հսկողության տակ գտնվող թե՛ լրատվամիջոցները, թե՛ հազարավոր ֆեյքերն ու իբր անկախ քաղաքագետներին ու փորձագետներին։ Բաքվից ստանալով հրահանգավորում՝ ՔՊ-ն ու նրանց թրքամետ առաջնորդը Հայ առաքելական եկեղեցուց կերտում են թշնամու կերպար՝ Կաթողիկոսի անձի մասին տարածելով կեղտոտ տեղեկություններ»։
Ալիքը նաև նշում է, որ քպականների մեջ քիչ չեն աղանդավորականները, և Հայ առաքելական եկեղեցու դեմ պայքարով լոբբինգ են անում աղանդավորականների շահերին՝ հուսալով ապագա ընտրություններում շահել Հայաստանի տասնյակ հազարավոր աղանդավորականների ձայները։
Ըստ հեղինակների, Արցախն Ադրբեջանի տարածք ճանաչողներն այժմ թիրախավորել են բոլոր ազգային, պետականաստեղծ ինստիտուտները՝ ընտանիք, Եկեղեցի, հայոց պատմություն, բանակ։ «Նրանք ցանկանում են ոչնչացնել հայկական ինքնությունը՝ ներդնելով կրթական ծրագրեր, որոնք ոչնչացնում են Հայ առաքելական եկեղեցին, նվազեցնում են նրա դերը, հարվածում են ռազմա-հայրենասիրական դաստիարակությանն ու ռազմական պատրաստությանը, նվազեցվում են հայոց լեզվի դասաժամերը»,-գրում է ալիքը և հավելում, որ, այսպիսով, ցանկանում են Հայաստանը դե-ֆակտո վերածել «Արևմտյան Ադրբեջանի»։
«Ժողովուրդ» օրաթերթը գրում է.
«Նիկոլ Փաշինյանի իշխանությունը հայտնվել է ստվերային վախի և բացահայտ քաջության միջակայքում։ Թեեւ հրապարակային խոսքով ՔՊ-ականները փորձում են վստահություն ներարկել հանրությանը, թե Փաշինյանի դիրքերն անվարան են, իրականում իշխանական կուլիսներում լարվածություն կա:
«Ժողովուրդ» օրաթերթը իր աղբյուրներից տեղեկացավ, որ Նիկոլ Փաշինյանի թիմակիցները տարբեր ձևաչափերում թեեւ փորձում են ծաղրել վարչապետի թեկնածուներին, իմպիչմենտի գործընթացը, այնուամենայնիվ, նրանք միաժամանակ ունեն կանխատեսումներ, որ ամեն պահի կարող է պայթել իրավիճակը: Դրա համար, շատերի ընկալմամբ, իմպիչմենտի գործընթացն իրենց սեղանին դրված «թուղթ չէ», այլ տագնապի ազդանշան։
«Ժողովուրդ» օրաթերթին հասած տեղեկությունների համաձայն՝ Նիկոլ Փաշինյանն այս փուլում որոշել է խուսափել կտրուկ գործողություններից. նրանք կսպասեն զարգացումներին, մինչև կգնահատեն, թե վտանգն ինչքան է խորանալու:
Իշխանությունն այս պահին վախենում է ոչ միայն ընդդիմությունից, այլ նաև հասարակությունից, որը սովորաբար լուռ է, մինչև որ դառնում է բուռն ալիք։ Այդ ալիքի ձայնը հիմա դեռ խուլ է, բայց հնչեղության վտանգը՝ իրական։ Առավել ևս Եկեղեցու դեմ հարձակումները հանրության շրջանում այնքան էլ լավ չեն ընկալվել»։
«Ժողովուրդ» օրաթերթը գրում է.
«Իշխանությունները, ի դեմս վարչապետ Նիկոլ Փաշինյանի, կոնկրետ պլան ունեն եկեղեցու, Կաթողիկոսի դեմ իրականացնելու համար, թեեւ գիտակցում են, որ Կաթողիկոսին հեռացնելը այդքան էլ հեշտ իրագործելի պլան չէ:
«Ժողովուրդ» օրաթերթի իշխանական աղբյուրները փոխանցում են, որ Փաշինյանը թիմակիցներին հստակ բացատրել է, որ պետք է Վեհափառին հեռացնել, բայց խելոք, քայլերի հաջորդականությամբ, երկարատեւ պրոցեսի միջոցով: Բանն այն է, որ Եկեղեցին ունի իր ներքին կանոնադրությունը, առաջնորդվում է դրանցով, և աշխարհիկ կյանքի միջամտություններից պաշտպանվելու իմունիտետ ունի:
Սա հաշվի առնելով՝ Նիկոլ Փաշինյանն իր թիմին բացատրել է, որ իրենք օրակարգում ունենալու են Վեհափառին վեհարանից հեռացնելու ծրագիրը, բայց չպետք է շտապեն ու սխալ քայլեր անեն: Նախ պետք է եկեղեցու ներսում գտնել դաշնակիցներ, որոնք ներսից կպայքարեն Կաթողիկոսի դեմ՝ դրսից ունենալով իշխանության աջակցությունը:
Իշխանությունների ներսում կան շատ անձինք, որոնք հայ առաքելական եկեղեցու հետեւորդներ չեն, ու նրանք ավելի են ակտիվացնելու եկեղեցու դեմ արվող հակաքարոզները:
Պլանն այնպիսին է, որ հասունացնեն դժգոհությունը, հետո Փաշինյանը հայտնվի պրոցեսների կիզակետում և Կաթողիկոսին հեռացնելու դափնիները իր վրա վերցնի»։