Հունաստանի հետախուզական ծառայությունը խոստովանել է, որ լրագրողի է լրտեսել։ Հունաստանի հետախուզության ղեկավարը խորհրդարանական հանձնաժողովին ասել է, որ իր գործակալությունը լրագրողի է լրտեսել, հայտնում է Reuters-ը՝ վկայակոչելով աղբյուրները։
Անցյալ շաբաթ հանձնաժողովի փակ լսումներ գումարվեցին այն բանից հետո, երբ PASOK սոցիալիստական ընդդիմադիր կուսակցության առաջնորդը բողոք ներկայացրեց դատախազություն՝ իր բջջային հեռախոսը ծրագրային ապահովման միջոցով գաղտնալսելու փորձի առնչությամբ։
PASOK-ի առաջնորդ Նիկոս Անդրուլակիսը բողոք է ներկայացրել Եվրամիության պաշտոնյաների աճող մտահոգությունների ֆոնին լրտեսող ծրագրերի վաճառքով զբաղվողների եւ լրտեսման համար ծրագրային ապահովման օգտագործման կապակցությամբ։
Լսումների ժամանակ հետախուզական ծառայության ղեկավար Պանայոտիս Կոնտոլեոնը հայտնել է, որ իր գրասենյակը լրտեսել է Հունաստանում CNN-ում աշխատող ֆինանսական լրագրող Տանասիս Կուկակիսին, Reuters-ին հայտնել են լսումներին ներկա երկու պատգամավոր։
Կառավարության ներկայացուցիչ Յանիս Օիկոնոմուն ասել է, որ Հունաստանի իշխանությունները լրտեսող ծրագրեր չեն օգտագործում, որոնք, իբր, օգտագործվում են լրագրողի հեռախոսը կոտրելու համար, ինչպես նաեւ գործեր չեն վարում այն վաճառող ընկերությունների հետ:
«Կառավարությունը թաքցնելու ոչինչ չունի, եւ այն արդարադատության համակարգին կոչ է արել մանրակրկիտ հետաքննել այդ դեպքերը,- ասել է նա։- Առանց տեխնոֆոբիայի ծայրահեղության մեջ ընկնելու՝ այսպիսի չարամիտ ծրագիրերն իսկապես սպառնալիք են ներկայացնում եւ դրանց դեմ պետք է արդյունավետորեն պայքարել»:
Ապրիլին Հունաստանի դատախազը հետաքննություն էր սկսել Կուկակիսի այն պնդման առնչությամբ, որ իր սմարթֆոնը վարակված է լրտեսման համար ծրագրային ապահովմամբ։