Իսրայելի վարչապետ Յայիր Լապիդը կիրակի մեկնել է Գերմանիա, որպեսզի համոզի արեւմտյան տերություններին հրաժարվել Իրանի հետ միջուկային գործարքից (Գործողությունների համատեղ եւ համապարփակ ծրագրից), տեղեկացրել է AFP-ն։

Իսրայելը վաղուց դեմ է հանդես գալիս 2015թ. համաձայնագրի վերականգնմանը, որը հանգստի վիճակում է այն ժամանակվանից, երբ ԱՄՆ նախագահ Դոնալդ Թրամփը միակողմանիորեն դուրս եկավ դրանից 2018թ. եւ նորից կոշտ պատժամիջոցներ մտցրեց Թեհրանի դեմ։

Անցած ամիս նկատված առաջընթացը համաձայնագրի վերականգնման ուղղությամբ, թերեւս, դանդաղել է, այն բանից հետո, երբ երեք եվրոպական պետությունները, որոնք համաձայնագրի մասնակիցներ են՝ Գերմանիան, Ֆրանսիան եւ Մեծ Բրիտանիան, շաբաթ օրը «լուրջ կասկածներ» էին հայտնել համաձայնագիրը վերականգնելու Իրանի մտադրության անկեղծության վերաբերյալ։

Բեռլին թռչելուց առաջ իր կառավարության անդամների հետ հանդիպման ժամանակ Լապիդը շնորհակալություն է հայտնել «եվրոպական եռյակին» «ուժեղ դիրքորոշման» համար, որը նրանք հնչեցրել են շաբաթ օրն արված եռակողմ հայտարարությունում։

Լապիդն իր կառավարությանն ասել է, որ «Իսրայելը հաջող դիվանագիտություն է վարում, որպեսզի կանգնեցնի միջուկային համաձայնագիրը եւ կանխի Իրանի դեմ պատժամիջոցների չեղարկումը»։

«Սա դեռ վերջը չէ,- ավելացրել է նա։- Դեռ երկար ճանապարհ կա անցնելու, բայց հուսադրող նշաններ կան»։

Իսրայելական դիվանագիտական աղբյուրը AFP-ին ասել է, որ Բեռլինում բանակցությունների կենտրոնում լինելու է Իրանը։

«Կարեւոր է շարունակել դիրքերի համակարգումը եւ ազդել եվրոպական դիրքորոշման վրա։ Գերմանիան այս հարցում կարեւոր դեր է խաղում»,- ասել է աղբյուրը։

Լապիդը, որը ճամփորդում է անվտանգության ծառայության բարձրաստիճան աշխատակիցների ուղեկցությամբ, պետք է հանդիպի կանցլեր Օլաֆ Շոլցի, արտաքին գործերի նախարար Աննալենա Բերբոքի եւ նախագահ Ֆրանկ-Վալտեր Շթայնմայերի հետ մինչեւ երկուշաբթի երեկոյան Իսրայել վերադառնալը։

2015թ. համաձայնագիրը, որը պաշտոնապես հայտնի է որպես Գործողությունների համատեղ եւ համապարփակ ծրագիր, Իրանին պատժամիջոցների թուլացման հնարավորություն է տվել իր միջուկային ծրագրի սահմանափակման դիմաց։

Վիեննայում 2021թ. ապրիլից վարվող բանակցություններն ուղղված են համաձայնագրի վերականգնմանը Թեհրանի դեմ պատժամիջոցները հանելու եւ Իրանի կողմից իր նախորդ միջուկային պարտավորությունները լիովին կատարելու միջոցով։

Անցած ամիս Եվրամիությունը, որը հանդես է գալիս որպես բանակցությունների միջնորդ, ներկայացրել է համաձայնագրի «վերջնական» նախագիծը։

Վաշինգտոնը Թեհրանի պատասխանը «հետքայլ» է անվանել։

Իրանն, իր հերթին, հայտարարել է, որ ԳՀՀԾ-ի եվրոպական մասնակիցներն ընկել են Իսրայելի ազդեցության տակ։