Նիկոլ Փաշինյանը խորհրդարանում Կառավարություն-ԱԺ հարցուպատասպանի ժամանակ բացատրեց, թե ինչու Հայաստանի իշխանությունները մերժեցին մեր երկրում ՀԱՊԿ զորավարժությունների անցկացումը, բայց գրկաբաց ընդունեցին Եվրամիությանը առաջարկը՝ նոր դիտորդական առաքելություն ուղարկելու վերաբերյալ։
Փաշինյանի խոսքով՝ մինչեւ ԵՄ դիտորդական առաքելության Հայաստան գալը, Ադրբեջանը արեւմտյան հարթակներում իր ագրեսիվ գործողություններն ընդդեմ Հայաստանի բացատրում էր նրանով, որ ՀՀ վարչապետը ռուսական զորքեր է բերում եւ տեղակայում հայ-ադրբեջանական սահմանին ու պատրաստում է հայ-ռուսական համատեղ ագրեսիվ հարձակում Ադրբեջանի դեմ։
«Ըստ արեւմտյան մեր գործընկերների՝ Ադրբեջանն իր ագրեսիվ հարձակումներով փորձում է շատ թե քիչ հավասարակշռել իրավիճակը՝ իր խոցելիությունը կառավարելու համար։ Արեւմուտքում փորձ էր արվում Հայաստանը ներկայացնել որպես Ռուսաստանի ագրեսիվ քաղաքականության մասնակից, իսկ Ռուսաստանում փորձ էր արվում ներկայացնել որպես արեւմտյան դավադրության մասնակից։ Արեւմտյան մեր գործընկերները սկսել էին մեզ խեթ նայել, թե պատրաստվում եք ագրեսիվ գործողություններ իրականացնել, որովհետեւ այնտեղ ռուսական զորքերի մեծ կուտակումներ կան, պատրաստվում ենք Ադրբեջանի վրա հարձակվել, խեղճ ադրբեջանցիները ստիպված բարձունքներ են ուզում գրավել, որպեսզի հավասարակշռեն իրավիճակը... Մենք ասացինք՝ շատ լավ, եկեք՝ տեղում դիտարկեք ու տեսեք՝ իրականությանը համապատասխանում է, թե չէ»,-ասաց Փաշինյանը՝ հավելելով, թե աշխարհաքաղաքական ենթատեքստ սրանում չկա, կա կոնկրետ օրակարգ, որով շարժվում են։