Հայաստանի անտաղանդ կառավարության ու նրանց պայմանավորվածությունների արդյունքում կորցնում ենք Արցախի տարածքները, խայտառակել ենք պետությունը, մեր ազգային արժանապատվության հարցն է։ Այս մասին MediaHub.am-ի հետ զրույցում ասաց Հայաստանի ԶՈւ հիմնադիր, պաշտպանության նախկին նախարար, ԽՍՀՄ և ՌԴ զինված ուժերի գեներալ-լեյտենանտ Նորատ Տեր-Գրիգորյանցը:

Ըստ նրա՝ այսօր անընդհատ զիջում ենք, որովհետև քանդել են բանակը, պատշաճ ուշադրություն չեն դարձրել և հայտնվել ենք թույլ կարգավիճակում, շարժվում ենք Ադրբեջանի թելադրանքով։ Գեներալ-լեյտենանտի խոսքով, թեև օգոստոսի 25-ն է, բայց Լաչինի միջանցքի հետ կապված հստակ տեղեկատվություն չի տրվում։ 
«Այս առումով բարդակ է։ Մինչև նոր ճանապարհը չկառուցվի, Լաչինի միջանցքը չպետք է անցնի Ադրբեջանի վերահսկողության տակ, բայց, ցավոք սրտի, ռուս խաղաղապահների մեջ լուրջ անհամաձյանություններ կան այս հարցի շուրջ։ Իմ տպավորությամբ՝ ռուսական խաղաղապահ զորքերի հրամանատարն այնքան էլ լավ չի պատկերացնում, թե ինչ գործողություններ պետք է արվեն, փոխգործակցությունը լավ չի կազմակերպվում։ Հայաստանի և Արցախի իշխանությունները ևս չեն պատկերացնում։ Ռուսական կողմին և Ադրբեջանին պետք է հիշեցնել, որ եռակողմ հայտարարությամբ հանձնման այս ժամկետն արձանագրված չի եղել»,-ասաց նա։

Նորատ Տեր-Գրիգորյանցն անընդունելի է համարում ձևակերպումները, թե տարածքները վերադրաձվում են Ադրբեջանին։ 
«Ղարաբաղը բոլշևիկները 21 թվականին խլել են Հայաստանից և տվել Ադրբեջանին, ու այն 70 տարի գտնվել է թուրքական, մուսուլմանական պետության վերահսկողության տակ։ Այն հազիվ ազատագրվել էր, հանրաքվե է անցկացվել ու անկախ հռչակվել։ Բայց պետք է ամբողջությամբ ճանաչել Ղարաբաղը, այն վերադարձնել հայրենիք ու բանակցություններ տանել Ռուսաստանի հետ, որպեսզի իրենք չեղարկեն Կարսի պայմանագիրը՝ 21 թվականի պայմանագիրը։ Ռուսաստանը պետություն է, ում հետ ուզում է գրկախառնվում է, բայց ինչո՞ւ են գրկախառնության արանքում զոհաբերում հայերին։ Վերադարձրեք Նախիջևանը մեզ։ Ինչպե՞ս ՌԴ-ն ճանաչել է Աբխազիան, Հարավային Օսեթիան։ Պետք է ընդունել Արցախի անկախությունը։ Պետք է ՌԴ-ն ընդունի, որ իր նախորդները սխալ են արել»,-ասաց նա։ 

Նորատ Տեր-Գրիգորյանցի խոսքով՝ գործողությունների, պայմանավորվածությունների այսպիսի տրամաբանության պահպանման դեպքում թշնամին ավելին է ուզելու. պետք է վերակառուցենք, արդիկանցնենք բանակը։ «Թուրքիայից, Ադրբեջանից ամեն ինչ սպասելի է, պետք է պատրաստ լինել պատերազմի։ Տեսնում է նաև, որ դաշնակից ՌԴ –ի հետ հարաբերություններ ենք փչացնում։ Հոգիս ցավում է, առանց հուզմունքի չեմ կարողանում խոսել, մենք այդ տարածքները հեշտ չէինք ազատագրել, բանակը հեշտ չէինք կառուցել»,-եզրափակեց գեներալը։

 Անի Գևորգյան