Կրեմլը բացասաբար է վերաբերվում Ռուսաստանից առանձին լրատվամիջոցների ղեկավարների և պատգամավորների Հայաստան մուտքի արգելքին. այդ մասին այսօր՝ մարտի 10-ին, հայտնել է ՌԴ նախագահի մամուլի քարտուղար Դմիտրի Պեսկովը։
«Անկեղծ ասած, մենք բացասաբար ենք վերաբերվում դրան։ Հայաստանը մեր մեծ բարեկամն է, դաշնակիցը, ռազմավարական գործընկերը և, իհարկե, երկկողմ հարաբերությունների մակարդակն ու բնույթը մեզ պարտավորեցնում են պաշտպանել մեր երկկողմ հարաբերությունները նման դեպքերից»,- ասել է Պեսկովը՝ պատասխանելով համապատասխան հարցին։
Կրեմլի խոսնակը նաև հույս է հայտնել, որ Ռուսաստանի և Հայաստանի երկկողմ հարաբերությունները «տեսանելի ապագայում զերծ կլինեն նման դեպքերից»։
Հիշեցնենք, որ այս շաբաթվա սկզբին հայտնի դարձավ, որ Երևանի «Զվարթնոց» միջազգային օդանավակայանում ռուս լրագրող և հրատարակիչ, News Media հոլդինգի հիմնադիր Արամ Գաբրելյանովին արգելել են մուտք գործել Հայաստան։ Մինչ այս «Россия Сегодня» մեդիա խմբի և RT հեռուստաալիքի գլխավոր խմբագիր Մարգարիտա Սիմոնյանը, Պետդումայի ԱՊՀ հարցերով կոմիտեի նախագահի առաջին տեղակալ Կոնստանտին Զատուլինը ևս «անցանկալի անձ» էին հայտարարվել։