ԱՄՆ-ը պետք է ավելի շատ նավթ արդյունահանի համաշխարհային էներգետիկ ճգնաժամի պայմաններում։ Այս մասին հայտարարել է JPMorgan-ի գլխավոր տնօրեն Ջեյմի Դայմոնը։
«Ակնհայտ է, որ Ամերիկան իրական առաջնորդի դեր պետք է խաղա՝ Ամերիկան է կայունացնող արտադրողը, ոչ թե՝ Սաուդյան Արաբիան»,- CNBC-ին տված հարցազրույցում ասել է Դայմոնը: «Եվ մենք պետք է դա ճիշտ անեինք՝ սկսած մարտից: Արդեն շատ ուշ է ճիշտ անելու համար, քանի որ դա ակնհայտորեն երկարաժամկետ ներդրում է... Իմ կարծիքով, Ամերիկան պետք է ավելի շատ նավթ ու գազ մղեր»:
ԱՄՆ-ն աշխարհում նավթի խոշորագույն արտադրողն է՝ օրական արդյունահանելով 18,9 միլիոն բարել վառելիք, ըստ Էներգետիկայի տեղեկատվության վարչության տվյալների: Սակայն ԱՄՆ-ը նաեւ նավթի աշխարհի ամենամեծ սպառողն է, ուստի արտահանումը սահմանափակ է:
Համեմատության համար նշենք, որ ՕՊԵԿ-ի դե ֆակտո առաջնորդ եւ խոշոր արտահանող Սաուդյան Արաբիան օրական արդյունահանում է 10,8 մլն բարել նավթ, սակայն օրական սպառում է ընդամենը 3,2 մլն բարել, մնացածն արտահանելով, հայտնել է EIA-ն:
Թեեւ ԱՄՆ-ն էներգիայի հսկայական պաշարներ ունի, արդյունաբերության արտահանումը հասնում է գագաթնակետին եւ չի կարող ավելացվել մեկ գիշերում, Financial Times-ին ասել են թերթաքարերի ամերիկյան արտադրողները: