Ավազակային հարձակում՝ Արարատում. «Յանդեքս» տաքսու վարորդին թալանել են, նրան պատկանող ավտոմեքենայով դիմել փախուստի
SHAMSHYAN.com-ի տեղեկություններով՝ նոյեմբերի 26-ին ավազակային հարձակում է տեղի ունեցել Արարատի մարզում: Ժամը 04:25-ի սահմաններում ՀՀ Ներքին գործերի նախարարության ոստիկանության Արարատի բաժին է դիմել Երևանի բնակիչ 40-ամյա Գնել Ա.-ն և հայտնել, որ իր նկատմամբ ավազակային հարձակում է տեղի ունեցել և տարել են իր կողմից վարած ավտոմեքենան:
Ոստիկաններին ու քննիչներին Գնել Ա.-ն հայտնել է, որ ինքը տաքսի ավտոմեքենայի վարորդ է և անհայտ անձինք դանակի սպառնալիքով իրեն հարկադրաբար ստիպել են ավտոմեքենան վարել ամայի տարածքների ուղղությամբ:
Հասնելով Փոքր Վեդի՝ իրեն դուրս են հանել Opel մակնիշի ավտոմեքենայից և առևանգել մեքենան:
Նա հայտնել է նաև, որ այդ օրը «Յանդեքս» տաքսի ծառայությունից է պատվեր ստացել Երևանից դեպի Արարատ քաղաք, որից հետո Երևան հետ գալու ճանապարհին երկու ուղևորներից մեկը, որոնց չի ճանաչել, ձեռքով հետևից բռնել են իր պարանոցը, տվել սպանության սպառնալիքներ, պահանջել ավտոմեքենան, ապա իրենից հափշտակելով մեքենայի բանալիները, բջջային հեռախոսն ու իր մոտ եղած գումարը, իրեն դուրս են հանել ավտոմեքենայից, իջեցրել դաշտամիջյան տարածքում և հեռացել:
Դեպքի փաստով Վեդիի քննչական բաժնում նախաձեռնվել է քրեական վարույթ:
Ոստիկանությունն ու քննչական բաժինը ձեռնարկում են անհրաժեշտ օպերատիվ հետախուզական և քննչական համատեղ գործողություններ՝ հանցագործություն կատարած անձանց ինքնությունը պարզելու. նրանց և ավտոմեքենան հայտնաբերելու ուղղությամբ:
